催生

話說上星期廣華覆診, 醫生話呢個星期未生就返黎約催生, 尋日再覆診, 約我22號!!? 心唸咁快??? 我廣華既EDD係24號喎~~於是問醫生:「唔係通常過左先催既咩?」醫生話:「好呀咁約遲幾日啦, 冇咩所謂, 我驚你放得耐悶咪早D生囉~」@@ 姑娘就話要睇返醫生D期, 呢個姑娘好好, 已經見左好多次, 結果約左25號入院, 26號催~~ 突然變得好快! 仲有唔夠一星期就入院!! 如果丁叮呢幾日仲未想出黎的話~

其實黎到38W幾都仲未有其他媽媽講既恥骨痛, 同之前感覺差唔多, 呼叫暢順左, 冇再透唔倒氣, 上樓梯都冇氣喘, 係早幾日無啦啦肚痛, 我又唔係好識分喎, 第一日屙左幾次, 之後幾日都有D似痛非痛, 又好似痛痛地, 但係又冇屙, 都係好正常既便便…都唔知係咩痛又唔知點解, 問過醫生就話唔係成個子宮痛, 又冇收縮就唔係陣痛, 呢2日又咩都冇lu~

有左入院期之後覺得佢可能都未想出黎住~ 原本約左佢星期一覆診時黎料, 睇完一件頭, 19號又係我地既紀念日, 不過原來呢日唔o岩丁叮心水~~ 究竟佢揀左幾時呢~? 25號入院, 應該等唔倒31lu~ 估計26, 27出世~丁叮你鍾意呢2日呀~?

早幾日覺得佢郁得細力左都有少少擔心, 問醫生醫生就話有郁就得, 大力細力好難講, 呢幾日又明顯返~ 我又放心返~^^

9個月開始肚臍凸了…呢幾日肚臍周圍仲掂倒都痛, 可能皮膚太繃緊了…

仲有5日就入院, 最好入院就黎料~~快快出黎同我地見面啦~^3^

雖然經過十個月, 但仲係覺得好神奇, 好奇妙, 就快做媽媽喇, 好不可思議, 好感動…T^T



仲有就係, 就黎可以食雞蛋仔同蛋撻喇~~~XD 叫左老公買黎醫院探我~~~丁叮飲雞蛋仔蛋撻奶奶好冇呀~^333^