紅酒燴牛肋條(走紅酒)+粟米+恐龍蛋

冇咩update, 又冇咩做, post下今日既lunch box
買左個小小玻璃飯盒, 呢個角度睇好似好大, 實質佢可以放落上面隻碟中間, 放倒4條牛肋條同半碗仔飯, 好在牛肋條夠滯同埋有多條粟米, 唔係實唔夠飽…:p

恐龍蛋係老爺買既, 每星期返去食一餐, 老爺總會買一袋二袋生果俾我拎返黎, 成個禮拜都食唔晒…^^"


原食譜係紅酒燴牛尾, 之前都post過唔再post喇, 今次轉左牛肋條冇骨又冇咁多油, 味道差唔多, 冇落紅酒, 味道硬係好似爭d。
食完條粟米已經食唔落生果, 留返晏少少下午茶食~

懶人煲湯

火車站行過街市有一段路, 跟住買完送之後, 街市O個邊個小巴站永遠長龍, 可能幾架車都未上倒…所以唔會日日行過去…火車站上蓋就有百佳, 而火車站等小巴一定上倒…所以有時可能貴D, 都會去百佳…

百佳D菜都幾貴, 不過湯包好抵~

最近熱辣辣唔知做乜愛上煲湯~

老公好少飲湯, 所以我都好少煲, 煲左都係我主力~ 我一個人一晚可以飲晒成煲湯…

第一次試既係南瓜蜆肉湯~當晚係老公下廚~~出奇地好飲喎!! 唔鍾意南瓜既佢都覺得好好飲~之後我都煲過2, 3次~

第二款試既係羅宋湯~有幾舊牛尾咁, 好油…不過好好飲~! 我加左一罐茄膏~

第三款試青紅蘿蔔湯~冇咩特別, 不過都係咁好味~ 我用壓力煲煲左一個鐘~勁出味~

我飲湯唔係落鹽, 而係落魚露~係咪好貴? 唔記得當初點解會落魚露~不過落魚露好少過鹹~老公第一次飲仲覺得D湯好好飲, 甜甜地~

今晚煲左呢款螺頭沙蔘玉竹湯~今次壓力煲煲左40分鐘~已經好好味, 膠膠地~飲唔停~^^

壽司

壽司蛋糕每年做一次, 然而件裝的, 很多年沒做過了~~

為了消滅蛋糕剩下的紫菜, 做了以下的卷物~

特意留2件鰻魚作手握壽司

做了五大條~當然吃不了~2個人只KO了三條多一點

本想做小卷, 一條青瓜卷, 一條鰻魚卷, 一條腸仔卷之類的, 不過老公喜歡雜錦如加州卷之類, 便做了大卷~除了上述的, 還有蟹柳跟甜蛋~

甜蛋只是簡單的加上砂糖和酒煎成蛋餅(家裡的平底鑊都偏大…)^^"

這是翌日的午餐~^^

鹽焗雞脾+豬頸肉沙律

原本冇唸住將D豬頸肉放埋一齊, 不過煎完發覺有D乾, 又脆脆地, 不如做埋沙律啦~

買左3條青瓜~終於KO左2條~仲有一條依家用醋同糖浸緊~~~

超大隻雞脾~~鹽焗雞粉醃好之後拎去焗, 焗左40分鐘, 大O個隻都未熟透, 要再叮叮…

呢個做法係03年一位故友教既~不過當時佢教我煎, 可惜依家同呢位故人已經緣盡喇…

煲左煲飯, 同D送完全唔夾…=.= 又冇料可以炒…雪起左…聽日冇飯帶…=.=

德國鹹豬手+鹽煎三文魚+椰菜花

急凍豬手~根據包裝指示~先煮個半鐘, 跟住上糖漿焗20分鐘~
YUMMY~~~

加少少鹽煎香~簡單美味~^0^

烚熟之後加少少鹽同黑椒o係面~(麥當當早餐食剩XD)

老公又出馬

好耐冇POST過老公煮既野~

今日老爺先問我老公係咪唔會煮飯, 我話都會架~放假同埋我唔得閒O個時都係佢煮~

呢晚我有大project~整左成日蛋糕~於是又到老公出馬~^皿^

放工一齊去入貨~跟住我就開工~佢就整呢味久違既醉雞翼鴨舌~~~yummy~~~

晚餐有蒜蓉炒翠瓜~煎龍利柳同南乳蒸排骨~

唔知點解D龍利柳食落好似午餐肉…XD

佛手瓜炒豬肉+漢堡生菜包+白汁青口

2011.6.17

最滿意既~漢堡生菜包~
其實係用左茄汁芥末蒜蓉炒肉碎之後撈番茄汁~
口味好新鮮~好好味~^0^

番茄煮牛展+蒜茸炒勝瓜+台式肉燥飯

2011.6.6

豉汁蒸豆腐+鮮茄伴鴨胸+佛手瓜炒豬肉

幾樣新嘗試, 呢排我會星期六/日/一買定D凍肉同瓜菜, 早一晚o係上格拎落下格, 煮o個時再唸下點配搭~

今次煮鴨胸, 天氣夏想食酸野, 配左我一向鍾意既番茄~落d茄汁, 2個番茄, 少少糖, 加埋之前煎鴨胸既汁煮個杰淋上2邊~

未見過佛手瓜拎黎炒…哈哈~切o個時好鬼硬下, 隻手又好似搽左膠水咁…首先將d瓜飛左水先~炒肉片, 兜埋d瓜~肉片醃好, 落左瓜都唔駛調味, 不過煮瓜既水就落左雞粉。

老公好質疑既新嘗試, 之前試過豉汁蒸魚幾好味, 就試下蒸豆腐。

YUMMY肥牛金菇卷~~

好耐冇update過呢欄~

(原來對上一次係3月19日, 當日心情緊張, 7點就起身, 跟住煮呢樣煮o個樣, 當時既心情同依家真係天壤之別…)



呢味簡單易做又好味既送~同大家分享下~

老公以為用蠔油煮~其實係鰻魚汁~^^ 好好味呀我自己食到停唔倒口…^^"

原本唸住食粽唔煮送架喇, 跑完步返黎老公話煮啦~咁就煮呢樣~早一晚拎左包肥牛落下格解凍, 卷埋用鰻魚汁+少少雞粉煮個汁~估唔到咁好味~^皿^
2011.6.3

近日的家常菜

每晚都係3個送~

返左呢份工之後返到屋企都7點, 都係煮簡單野, 仲好多時有即食野^^"

蜜汁燒雞+洋蔥番茄貝殼粉

好耐冇post晚飯相~

今日等緊老公返屋企就過下相~

又係燒雞~
尋日行超市見倒咁o岩特價買左隻返黎, 居然有頭既>< 老公幫我斬左佢! 順手醃埋XD 今晚冇插o係燒雞架, 就咁放o係焗兜加錫紙2面焗左20分鐘出爐, 點知原來都係唔熟架, 要叮多幾分鐘:p

洋蔥番茄炒貝殼粉
整開燒雞, 就整埋意粉啦~點知意粉得好少, 煮左貝殼粉
清埋屋企d洋蔥同番茄~又搞掂一餐~^^