台灣之旅2011第一天-九份

5點幾離開十分, 原本坐上往平溪菁桐既區間車, 臨尾決定放棄, 早少少入九份歎下民宿~^^ 十個正~~下一篇再同大家介紹~~

搭左半個鐘車出返瑞芳, 買左個番薯食, 跟住就搭基隆客運入九份~估唔到咁夜都好多人, 車上唔少香港人, 不過入到去發覺好似日本人多D, 而十分放天燈既亦有唔少日本人~

o係hi life落車後開google map, 搵左一陣就搵倒我地間民宿喇~放低行李, 老闆娘請我地飲左2杯香甜紅茶, 俾左張地圖我地, 我地就出發去搵食喇~

話說我今次係第三次黎九份, 第一次冇發現左李儀鳳凰酥好好食, 第二次食左2檔最出名既芋圓~今次終於可以試多幾款喇~

一路行上山, 今次再黎, 為既就係呢度既夜景, 黎左2次都未睇過~

雖然太陽已經落山, 不過依然係熱到爆…
途緊亨利屋已經關門大吉, 第二朝再行過~不過當時剛開門…都係熱到爆…

幾經辛苦終於行到上山頂~~再黎探阿柑姨喇~~~
上次同2位同事黎, 食過賴阿婆同阿柑姨, 我地一致認為呢間好食好多~~2間好唔同架~可以自己比較下~鍾意邊種多d~^^

另外我地仲買左D特色小食返民宿涼住冷氣慢慢歎~依慣例都係對茶樓冇興趣^^"

原本唔係好想買既紅糟肉圓, 估唔到咁好味!!! 睇住佢O係兜油度筆出黎, 食落一D都唔油呀~個醬又好味~!! 第二日上山再ENCORE一碗出台北食~:P

阿蘭草仔粿~買左幾個唔同口味, 經常見倒好多人幫襯, 當時已經係7點幾, 好多鋪都收緊檔, 佢仲係咁好生意, 不過唔覺得好特別, OK LA~第二日幫襯左寶珠草仔粿, 書仔話係當地人幫襯既, 都係差唔多~

另外仲買左碗舊道口牛肉麵~佢有分牛肉麵, 同牛肉湯麵, 價錢差一倍NT45同NT90, 問老闆娘先知, 原來牛肉湯麵係冇牛肉既~~ 老公話D麵好好食~ 不過牛肉一般, 唔怪得有牛肉湯麵賣~~~ 之後再帶佢食永康牛肉麵, 佢話D肉真係好食好多, 不過麵就呢間好食D, 好滑~~

食完芋圓就行下老街, 九份既夜景真係唔錯呀~^^手機影都唔太差~

以下係日頭再作戰影既~原本老公話唔再行, 不過我地發現左"豬肉卷卷"! 居然呢度都有, 我地驚出返市區搵唔倒, 又第一日見倒時又收緊鋪, 惟有再黎多次…身水身汗…點知今次直頭搵唔倒…我地估佢應該未開…T_T

又係呢條熱屎辣辣既路…

昇平戲院依家變成咁, 上2次黎都係破爛戲院