八月

呢個月都算過得幾快, 過左個新年, 放左幾日假, 中間又有個30週倒數下~話咁快就32w喇~

picsmaile~
呢一日我, 爹爹同丁叮去左影大肚相~ 仲帶埋鞋仔同另一隻丁叮去~不過另一隻丁叮唔係影左好多幅呢…:p 不過就有熊熊仔陪佢玩~^.^
2星期後先有相睇, 到時會再約時間, 唯一問題係要自己化妝, 我試過化完仲恐怖過素顏…結果只係上左少少濕粉胭脂同唇彩…希望到時揀倒相啦…攝影師哥哥麻煩你執靚d呀~~~

增磅…
新年過後唔知係咪跟餐跟得冇咁足…食多左肉, 又偷食年糕同蛋糕既關係, 重左呀…由發現糖尿開始2個月都冇重過, 新年仲輕左, 點知年假後重左喇…可能係丁叮增重速度加快, 反依家total重左16磅喇~~聽講last2個月重得好快, 希望可以20-25磅埋單啦…><

不適
幸運地到依家都冇咩不適(touchwood), 媽媽會好多媽媽都有各種問題：水腫、痔瘡、皮膚痕養、肚紋、胃酸倒流、抽筋、失眠、尿頻、便祕, 我暫時都未有發生，早2晚d腳趾有d痛, 日頭又冇事, 不過依家又好似冇事喇, 究竟水腫會唔會痛既呢? 我d戒指同未有前一樣鬆緊, 著鞋亦冇問題, 所以應該未有水腫, 可能我都飲幾多水, 同埋食得唔濃味。抽筋早3個月試過連續幾晚, 之後注意左訓覺時對腳唔好吊落床邊就冇事, 最近仲墊左咕o臣, 訓得都幾好~ 而丁叮移動或踢踢多數發生o係日頭, 未試過俾佢踢醒 ^3^ 尿頻方面, 有時會覺得好快急, 不過唔理佢一陣又唔急, so far都唔係成日去廁所, 夜尿亦唔多, 都係以前咁, 間中一次半次, 又唔係晚晚有。便便一向都ok, 可能我飲得多水又食得多菜、麥呢d, 依定整包都會落麥皮麥粉, 菜一日差唔多食2斤, 返工飲水會多d, 放假就少d, 平均一日都有一次便便。

糖尿
上個月頭見完營養師之後, 黎緊星期四再覆診, 呢幾個禮拜篤手指都冇咩問題, 都係5-6咁上下, 有次3.5, 有次7.2, 不過隔4個字再篤又去返5.x, 都算控制得唔錯, 不過有時就好恨食甜品, 可恨3次去到都過左tea time食唔倒…真係天意…

丁叮
29w5o個次覆診大少已經有3磅2oz, 黎緊最有34w先會再照, 唔知到時幾重呢? 上次見面頭仔向下, 唔知依家又向邊呢?

肚子大小
最大度倒39寸, 有時又會細d, 38-38.5咁上下, 睇相個個都話大, 見倒面就話點解細咁多, 或者唔係好大咋喎~~ XD 同事話我行路仲好靈活, 唔似大肚婆, 舊同學話後面睇唔似有左, 同埋塊面冇肥到^^

家具用品
床仔同highchair已經送左黎~洗衣液洗奶樽液都收倒喇, 等出太陽就可以洗衫~奶泵又收倒, 可以同奶樽一齊消毒好之後放雪櫃備用, 大件野差車車未叫佢送貨, 床仔今日師傅上黎砌左, 不過入唔倒房門, 遲下等我入左院老公拆左佢同搬過d書檯等家具先放入房, 原來個位真係剛剛好…做唔倒搖床lu :p

走佬袋
執左大半, 主要差bb衫未洗未入得袋~之後老公會拎返鋪頭, 我只袋2塊巾o係身跟入院, 希望到時唔好太呢hea啦~好似我同事咁覆診o個日o係廁所見紅就最方便喇~

清胎毒
未夠7個月開始食芝麻粉, 有時沖奶,  多數整麵包, 整過一次戚風:p 腐竹糖水煲過一次, 買錯三邊腐竹, 煲極都唔溶, 冇落糖, 都幾唔好飲, 聽講同豆漿差唔多功效, 咁我飲返豆漿算喇, 而且其實我一直都冇戒豆漿… 尋晚第一次食西瓜~^0^ 遲下食埋涼粉先~不過唔落糖又少d樂趣…=.= 過多一個月先飲白蓮鬚同綠豆沙~


仲有唔夠5個星期就足月, 返多3個幾星期就放假~期待期待~~^0^