十二月。忙

忙。

忙到不得了！

返工忙，放工更忙。

平時返工有時幾星期冇咩做，呢個月枕住都有野做，有時返工做到放工(十個鐘)。不過都唔夠放工忙。

呢個月有幾場婚宴、生日會同聖誕禮物既食物要整。總共3個蛋糕, 150個cupcakes, 400個馬卡龍, 大部分集中o係呢個星期, 已經有幾單接唔倒，忙得不得了!

放工返到屋企7點開始整餅，有時襯焗緊野既空檔煮飯，然後一路開工到一兩點，第二朝五六點起身～

個爐早排入左廠，要重新適應另一個爐（舊同事既結婚禮物），雖然係同型號同牌子，不過脾氣完全唔同，呢個暴燥好多…花左一個星期總算捉摸倒佢～舊爐返黎，換左發熱線，又要重新適應…另外等緊部新爐，可能月尾會有貨，不過依家已經唔急喇。

一晚整一個戚風連幾十個cupcake真係挑戰我既極限，尋晚只係裝飾戚風同整cupcake都整到2點，今晚又係一個戚風+CUPCAKE, 不過今次戚風未焗、馬卡龍要加工，好在做唔起都仲有聽朝，不過聽朝有另一單要送貨：ｐ

原本忙到呢個星期，下星期突然多左２單，好在數量唔多，但係星期日早晚2場飲宴，星期二約左人食飯，星期三晚返老爺度做節，時間都係剛剛好夠用。

 

原本最鍾意既十二月，最鍾意既聖誕就黎過去，都冇時間好好享受，甚至冇時間煮飯，冇時間訓，亦要難為老公陪我冇飯食，冇時間休息。

最近老公投訴我花太多時間整餅，冇時間俾屋企，叫我接少ｄ。依家我全情投入剛起步既事業，為既係將來可以多ｄ時間留o係屋企多d時間俾屋企。

依家份工唔能夠做一世，我想轉營，想創業，想將來可以home offie o係屋企湊仔就要付出。起步緊係辛苦架啦，難得大家信任我，將重要既一環交俾我，甚至冇試食過，未見過我都願意搵我，除左搵錢，我本身都好想接每一個job，參與每一場大家願意讓我參與既婚禮。我知道有ｄ新娘子好重視結婚蛋糕呢一環，素未謀面，大半年前就落訂（我依家已經收倒出年12月既訂金），對於各位既信任我受寵若驚，希望能夠努力做到最好，唔會令大家失望。

我未必可以發得大，未必可以出名，未必可以賺大錢，我只希望每一位信任我既客人都滿意我為佢地做既野。但我亦知道人人口味唔同，有時可能會遇倒錯挫，所以每次都總係膽戰心驚，又驚運送時有咩差遲。緊張忙碌過後得到新娘子既鼓勵，知道佢同佢先生甚至賓客都喜歡，係我最大既得著。

 

 

曾經話過，婚禮行業係最接近幸福既行業，我希望可以一直為各位錦上添花。

對不起老公，辛苦你了，請你支持我，好嗎？