小一叩門有感

最近見倒好多好細個既小朋友, 探訪幼稚園見倒佢地O岩O岩訓醒矇下矇下, 其中一個訓醒掛住媽媽喊; 今日考小一備考生試, 由收表見倒家長為小寶貝準備既學習歷程檔案,用心準備資料, 甚至見倒一位家長因為小朋友話: 「入唔倒呢度佢話唔返學」情緒激動眼濕濕, 到今日監考, 見倒佢地又要面對人生一個挑戰, 望住佢地既小手, 唸起最後一次見米米既小手…
人生真係一關一關咁過, 出生之前已經過左好多關, 先能夠成為一個健康既BB, 出左世又要等滿月先係叫做真正可以開心, 跟住細細個就會發燒, 面對各種疾病, 入幼稚園學習獨立, 同DADDY MAMMY分開, 學習同陌生人相處,然後面對考試測驗, 一關一關, 黎到小一入學試, 小小年紀就面對挫敗入唔倒心儀學校, 要同好朋友分開。
以前會覺得派唔倒名校/第一志願有咩咁緊要呀?邊度都係咁讀架啦, 要學好學壞, 度度都可以; 依家望住o個位激動泛淚既家長, 我受到感動, 呢d就係父母既愛, 只係希望小朋友開心, 可以繼續同好朋友一齊, 開開心心咁返學…
今日應考既小朋友, 當中有d好叻但好認叻, 有d好呆咩都唔識, 但係唸下, 佢地可以健健康康成長到5, 6歲, 已經好叻, 我地好多時忽視左自然而然發生o係我地自己身上既野, 我地一路都冇為自己既健康努力, 我地可以好輕易黎到依家咁既年紀, 順順利利升讀小學、中學、大學, 拍拖, 結婚, 回望過去, 原來我地已經走過好多關。其實每一關都唔簡單, 原來我地得到好多眷顧。

假如將來有小朋友, 我要教佢誠實、正直、謙虛、心胸廣闊不計較, 而最重要既係--感恩。
當你失去一d野既時候, 要唸下自己得到既其實更多。

來到呢個世界既時候, 我地本來咩都冇, 我地又有乜野可以失去呢。我地只有比到來既時候得到更多, 我地只能夠感恩。