一日既痛換黎一世既快樂

早幾日老公send左一篇高登既生仔文章俾我, 佢話好好笑, 個媽媽講得好抵死~

原來依家政府醫院唔想聞笑氣係可能會冇貨, 想做無痛係要星期一至五朝九晚五既…最後o個位媽媽(側太)咩都冇做之下, 痛左十幾個鐘…因為bb太大而要開刀=0=好唔抵XD

側太自言係好怕痛好怕痛既人, 不過生完之後佢認為係痛, 不過係可以捱得過既痛, 而且一日既痛換黎一世既快樂佢覺得好值得。打算生第二胎, 可以選擇開刀或者順產, 佢都係會再試一試順產。

雖然依家唔知道呢種快樂係咪一世, 報紙太多倫常慘案, 生個仔出黎眠乾睡濕湊大佢, 而佢大個可能掉低你, 可能虐待你, 可能殺左你…(當然我相信都好視乎你點教)不過無論將來會係點, 至少你既快樂唔會係一日。

由依家咩都未有甚至未開工, 已經開始掛住佢。

剛剛睇倒另一個BLOG, 呢位準媽媽早前作小產, 睇見佢見醫生時不停喊, 話好唔捨得BB, 我都眼濕濕。日日24小時一齊, 更甚可能係期待已久, 雖然如呢位準媽媽所言, 就算要走都係BB既決定, 每4位媽媽就有一位可能會o係3個月內小產, (唔怪得話bb小器, 唔好咁早同人講, 可能只係廢事冇左要解釋一輪)一路唔覺身邊咁多呢d case, 直至睇blog先發現原來情況的確幾普遍, 只係你既朋友唔會周圍同人講自己小產左。

另一位朋友, 結婚多年, 一路都唔成功, 睇勻中西醫, 有過2次都跌左…男人成日睇得太輕鬆, 小生命真係得來不易呢, 我成日都話, 你唔想要既時候就最易有…十幾歲冇能力生冇能力養o個d就最易有…

所以點解我成日咁急, 雖然想生龍仔, 但係成日覺得一年得12個月, 係咪咁易成功呢…

睇見另一位朋友剛出世既bb未改名, 自己亦冇唸住改(交俾老公), 但我倆已經一早改好, 我唸男仔可能都係用呢個架喇(除非到時bb俾感召我話唔鍾意呢個要另一個XD)老公話, 名已經俾左第一個BB, 如果到時跌左, 都唔會再用, 要再改…你話咁有感情, 如果真係跌左就好似失去左一個仔女咁…

有D朋友或者blog友都有小產經驗, 佢地都會叫自己第一個出世既仔女做2仔/2B。

 

FACEBOOK近來好多小朋友出世, 睇見人地既小朋友, 雖然唔係個個都咁得意, 亦唔能夠預知我既仔女係咪趣緻一族。以前驚如果個B唔靚會唔錫佢, 依家我唸除非有產後抑鬱啦…

當BB仲o係另一個世界, 可能仲未死未準備投胎既呢一刻, 我就有d掛住佢喇…好似早幾年同同事去台灣三日兩夜, 決定行程之後, 仲有成個月先出發我就開始掛住老公…

 

幾時開始恨生仔呢? 我唸係大約4年前, 老豆一個sms話佢朋友個女同我一樣大已經生左個女, 可能就係o個時起突然好恨生BB, 究竟我地可唔可以順利得倒龍仔呢~~~