仔女的疑惑

睇過好多傳聞, 等你o係未照倒性別之前估下係仔定女。

1. 凸肚臍
有人話生仔凸肚臍

個案一, 一位朋友既朋友一直覺得自己生仔, 照倒係女時佢完全唔能夠接受, 話冇可能個喎!!凸肚臍個喎!! 朋友仲笑佢唔通飲得太多塑化劑? 最近生左出黎, 的確係女…XD
個案二, 呢位媽媽到生之前的確凸肚臍, 而佢係生仔
個案三, 剛剛睇見一位blog友BEA 2XW已經凸肚臍~~但係囡囡啊~我一向認為肚大肚臍就凸架啦~原來2X W都會~~

2. 肚圓肚尖
肚圓生女, 肚尖生仔

其實我唔係好識睇點樣係圓點樣係尖, 同肚大肚細一唔一樣?

個案一, 一位舊同學陀B時肥左5X, 60磅, 7個月時見佢真係肥左好多, 成個身橫晒, 佢生仔~
個案二, blog友QQ同biu媽(嘉嘉)仲有老公一位舊同學都係身型一d都冇肥, 只係肚凸, 呢位舊同學, 生完好似冇生過一樣咁fit, 佢地3位都係生仔

3. 背面睇唔出有左
相傳陀仔的話背面睇唔出有左

個案一, 呢位媽媽臨生之前一個月去沙灘著bikini既背影完全睇唔出有左, 生仔~
個案二, 一位BK媽媽話佢6, 7個月仲成日俾人撞, 因為背後睇唔出有左, 生女

4. 肚多毛生仔
有人話肚多毛生仔, 的確有唔少人陀仔肚多毛, 不過亦有唔少多毛既生女

個案一, 我識得3位blog友陀女都好多毛
個案二, 我同事上胎肚冇生毛, 生左個女

5. 肚上黑線
直就係仔, 曲就係女…咁都唸得倒…
呢樣我冇考證過…大家可以研究下XD

暫時有3位生仔既媽媽都話係直喎~~

6. 酸兒辣女
網上有呢個說法, 陀仔鍾意食酸, 陀女鍾意食辣, 又有人話陀仔鍾意食鹹野, 陀女鍾意食甜野

個案一, 呢位媽媽有左之後好鍾意食酸, 番茄呀, 醋呀呢D, 唔特別愛辣, 而佢又的確唔點食甜野, 不過一向都唔點食甜野, 陀仔
個案二, 呢位BK媽媽有左之後成日食甜野, 作嘔又食甜野, 陀女

7. 陀仔食肉, 陀女食菜

個案一, 唔見得特別鍾意食肉, 口味同有之前其實變化不大, 都係鍾意食菜, 不過有D菜太涼唔敢食咁多, 有左初期鍾意食餃子, 中期鍾意食豆腐, 陀仔
個案二, 鍾意食菜, 同未有前一樣, 口味冇咩轉, 陀女
個案三, 鍾意食肉, 同未有前一樣, 口味冇咩轉, 陀仔

8. 暗瘡
好多人因為呢一點估自己陀既係仔定女, 話說陀仔會勁爆瘡

個案一, 冇特別點爆, 係額頭出粒粒出左2, 3個月, 陀仔
個案二, 勁爆瘡, 陀女
個案三, 因為皮膚好估自己陀女, 結果係仔
個案四, 因為爆瘡估自己陀仔, 結果仔女

9. 行路快慢
有人話陀仔行得快, 其實我覺得攰就行得慢架啦, 陀得冇咩唔舒服咪快囉:P

個案一, 行得快, 一向都行得快, 陀仔
個案二, 最初同中期都行得快, 2者之前有一期行得好慢, 去旅行又唔行得耐好易攰, 陀仔

10. 嘔唔嘔
有人話陀仔嘔, 陀女唔嘔, 亦有人話陀仔唔嘔陀女先嘔, 我一直以為陀仔嘔, 因為陀仔既媽媽好似唔會點肥, 後來又有人同我講陀女先嘔得勁, 陀仔唔嘔

個案一, 接近3個月先開始嘔, 嘔到5個幾月, 嘔到慣晒, 生女
個案二, 完全冇嘔, 連作嘔都冇, 個肚又細, 個個都估係仔, 結果生左我~XD呢個係我媽既經歷~~
個案三, 其中2個最好既朋友, 全程冇嘔過, 一個冇咩點肥, 一個肥左好多, 2個都係生仔
個案四, 一位舊同學, 嘔到傻, 生仔
個案五, 冇嘔過, 只有作嘔, 一日2, 3次, 為期大約2個月, 陀仔


11. 母親的直覺
其實咁多點我最相信呢一點, 有時唔係個個女人有直覺, 不過當你有左既時候, 你可能會有不知名既感覺, 強烈覺得係仔或者係女, 唔係因為以上種種原因, 只係直覺, 你可能行得好慢, 冇咩肚毛, 冇咩暗瘡但係覺得係仔, 唔知點解, 就係覺得, 你可能o係排卵前開工, 但都覺得係仔。你又可能爆晒瘡, 行得好快, 好多肚毛, 但係行街會不自覺睇hello kitty野, 睇粉紅色野, 明明本身完全唔愛呢隻貓, 周身冇一樣粉紅色野, 我相信, 呢d就係母親既直覺。