滿月了

打算為丁叮擺百日宴的我們, 滿月只買了一盒開心果雪糕慶祝, 提早3日到老爺家跟一眾男家親友吃滿月飯, 老爺煮了很多送菜, 可是我吃了幾塊乳豬便很飽很睏, 原來帶寶寶上街是這麼累, 晚上7時許便那麼睏, 偏偏丁叮又很精神, 上的士有奶嘴才睡~

這是滿月正日的全家福, 丁叮洗完白白吃飽飽很合作~ ^^

419 從前某個19號在一起, 這一個19號有你~ ^^

最愛佢交豬樣~即變小可愛~

掃風樣好搞笑XD

食飽飽好滿足~

426 DAY32@健康院打針針唔驚, 呀左一聲未出房門已收聲~叻叻~出黎仲乖過之前

329 大手牽小手~

20小時陣痛之旅

話說我23/3朝早已經見紅陣痛, 不過當時痛下唔痛, 而且只係好似m痛咁, 老公聽倒好緊張, 工都唔敢返, 我沖左個涼, 嗌麥記返黎, 一路睇戲一路食, 點知下晝就唔痛喇…=.=
當時既status係:依家每次一痛就會笑笑口咁話:「痛喇痛喇」好少可痛得咁開心…可唔可以痛多d密d呀XD(真係黎料時就知味道:P)
點知到5點幾仲o係度等運到…
夜晚仲o係度唸去唔去老爺度等, 有咩入院都快, 最後都係留o係屋企, 一路同丁叮講唔好穿水住, 入左院先, 又聽講d水流乾生會好痛, 所以叫丁叮唔好穿水住, 點知入左院後就想佢快d穿…最後我都係唔知幾時穿水既…=.=
終於半夜痛醒! 十分鐘倒痛一次, 好似m痛咁, 以為2, 3點唸住有排捱, 點知一睇鐘已經5點幾, 太好了!!原來老公都訓唔著, 於是天光就起身出發~

7點幾去到廣華, 當時已經7-8分鐘痛一次, 每次十幾秒倒, 入到待產房check宮頸開得5分…=口=我唸即係半度…o my god~~~~~
轉左我上產前房…聽日先再同我check…(唔係馬…)

出發前食左芝麻方包, 尿糖超晒標…繼續食糖尿餐…但我發覺比正常餐好似係多左個橙同梳打餅

下晝已經4-6分鐘痛一次, 第一次用手機個胎動app居然係愛黎數陣痛…>< 當時都有出去行下, 不過一痛就要停…行兩行又返房坐下訓下…
冇幾耐有舊同學黎探我, 佢係樓下既姑娘, 黎到仲話我個樣唔似痛=.=佢生左2件, 話2個都好快, 一個鐘就搞掂…><
當時我只係想快d有人同我CHECK度數…幾經辛苦搵倒個好人姑娘同我check, 點知得一度…到左5點老公黎到不過未入得黎…我出去同佢行下, 不過都係唔行我耐, 行下停下咁, 嗌晒救命…差唔多6點我已經痛到喊…其實除左痛, 仲因為睇唔倒岸…呢種感覺好難受…咁痛都係一度…之後仲有幾耐幾痛呀…T_T
6點入得去就同老公入去, 亦都係食飯時間, 痛到完全唔想食, 有個似係高級護士既人黎到見我咁痛唸住快喇, 點知CHECK完都係1度…T口T 佢叫老公餵我食, 點都要食晒D飯佢, 我一路喊一路痛一路食下停下, 原本想問佢有冇咩止痛, 點知佢話1-3度係靠深呼吸…>口< 老公就一路叫我吸~~~~到盡, 慢慢呼~~~~~到盡咁, 3下吸呼就痛完一轉…隔3分鐘又痛過…一餐飯食左勁耐…
隔離床D人望同D家人朋友談笑風生, 我就喊晒口咁食飯…老公話可以代我痛就好, 佢唔怕痛…我原本都自命唔怕痛, 經過今次先知自己原本咁怕痛…8點後老公要出返去, 得返我自己O係房, 隔離床黎左3位媽媽, 2個遲過我入黎, 其中2個先後穿水可以落待產房…點解我仲唔穿水架…:( 姑娘話一係夠3度, 一係穿水就可以落去
十點幾O個陣出左去搵老公, 呢個時候我同自己講, 愈痛開愈快~~又繼續深呼吸鼓勵自己, 入去再CHECK…都係1度…絕望到爆…打俾老公同佢講, 你駛唔駛返屋企訓陣呀…丁叮係咪唔錫我呀…:(點解咁痛都係得一度…
半夜11點幾, 3個媽媽O係度呻吟, 佢地2個只係細細聲, 我已經頂唔順…痛O個陣唔再係細細聲哼哼聲…典晒咁…就係呢個時候發現自己原本比其他媽媽怕痛…:(D姑娘又成日問你幾耐痛一次, 痛到咁仲要數…>_<
到左點幾, "冷"左出去搵老公, 佢挨住D椅訓, 我唔知好唔好再叫姑娘同我CheCK, 好驚再CHECK都係1度…入去去完個廁所(好在房有廁所…)上返床跪左)O係度, 姑娘見倒就入黎同我CHECK, 3度!!!終於3度喇!!!姑娘話:「死啦…你3度都痛成咁…」有得落待產房我咩都唔理喇!!落到去有氣聞喇!!雖然唔知有冇用, 不過都叫有希望!!
叫左阿姐推輪椅黎, 叫我執定野, 我其實已經執好, 見隔離穿水時我已經執定, 帶2塊M巾一塊片入待產房就就OK, 其餘一大袋同你鎖起佢, 坐上輪椅之後就攬住成袋野同外套等, 不過O係輪椅黎到既時候, 姑娘話等陣, check埋對面床O個位媽媽先睇下邊個急D!!
唔係馬！！！！！！
跟住仲要話佢落去先！
下？？？？？
我自然嗌大聲Ｄ…佢就俾我落去先…叫阿姐轉頭上黎接埋對面床O個位媽媽
出到去見倒老公, 佢同我地一齊搭lift落去待產房, 入到去就問我駛唔駛去廁所, 上床駁機冇得去, 我話我剛去完先落黎, 今次訓O係朝早入院張床對面, 當時見倒位媽媽細聲呻吟, 佢應該差唔多生得落黎, 到我落黎先識佩服佢!我已經冇可能輕聲, 又唔係嗌晒O個隻, 不過一痛起黎就好似急屎咁, 6點O係產前房時姑娘已經話急屎就係, 開頭似急尿, 我一路都冇急尿既感覺, 急尿就好似一直都有…但我下晝已去左, 所以知道冇貨, 入到待產房, 姑娘話我係2, 3分鐘痛一次, 不過只係好輕微既宮縮…
我都唔理得咁多, 有氣聞就勁索, 一痛就索, 唔痛就停…由產前房一路俾人問係咪成個肚痛, 但我一直只係M痛, 肚底痛, 佢地就話未有耐, 而且呢D未係真係痛…=口= 又一次絕望…唔係呀馬…
聞住氣, 只係聽倒周圍好亂好多人, 隔離個媽媽好似4度先落黎, 唔知係咪之前我對面床O個位, 間中有姑娘行埋黎, 同埋叫我唔好典, 會碌落床…我記得當時腰都有D痛, 打側身向後拗, 呢個時候仲要你數胎動, 話數唔倒唔生得住, 但我真係完全感覺唔倒!!有個野俾你握住按掣, 我係一次都冇按過…後尾仲放低左…

CHECK完3, 4度, 突然feel倒有水湧出黎, 話俾姑娘知穿水, 點知佢睇完話冇…只係見紅…一灘血…嗚…仲唔穿…好失望呀…
突然有人埋黎問我想唔想快D生, 話有人等床位, 緊係想啦!!我一早已經想你同我催生, 不知幾後悔冇22號入院(原本醫生約我22, 我未有心理準備會O係EDD前催生, 於是約左25/3, 點知24/3就作動…)同我人手穿水快D生都好丫!我估就係呢個時候同我穿左水, 而我係完全冇印象…而3, 4度之後亦冇印象有人同我檢查開左幾多度, 我既印象只係去到3, 4度之後就話生得…中間發生咩事完全唔知…有人話笑氣冇用, 但我聞左時間就易過好多

之後又有話我屙左好多血, 知我好急, 跟住連人帶床推左我過產房! 隱約見倒斜對面床O個位媽媽好似係之前我隔離床穿水一早落左黎O個位媽媽, 我入黎時都留意倒佢, 原來穿水先都冇咩SO…
未入產房前有人問我老公陪唔陪產, 駛唔駛打俾佢, 我話佢O係門口, 佢話咁我唔打架喇, 之後老公話我知佢有唸過返屋企訓陣或者去麥記恰恰, 估唔到咁快, 原來我入左待產房只係2個鐘倒就入產房! 佢當時剛搵倒個比較舒服既位訓, 跟住就嗌佢, 佢入到黎都好迷, 而見倒我亦似乎聞氣聞到好迷…其實我完全聽倒姑娘講野, 老公都話姑娘既指示我好有反應, 叫我合埋口, 唔痛就休息, 痛就用力, 有時又叫我用力握手柄, 助產士開頭話都有少少位試下生先, 之後話同我開大左少少要聯針, 由老公入黎十分鐘倒就聽倒丁叮喊, 當時感覺係, 好好聽, 同埋, 佢唔係啞架XD 同時見倒老公眼濕濕, 而我自己果然一如所料係冇喊既, 痛到唔識感動…只係有終於完成任務鬆一口氣既感覺…
姑娘略略清潔就抱丁叮伏O係我身上, 玩到成口口水波…應該係吐返D胎水, 之後隔離有人要生, 老公就要出返去, 跟住同我聯針, 俾個笑氣罩我有需要就聞, 不過佢其實有打麻醉針, FEEL倒拉扯不過唔痛, O係產前房第一次種豆都唔痛, 到生O個刻都唔痛, 最痛應該係三度之後入去聞氣, 不過最難捱係入院後O個18個鐘既1度…
3度之後其實好幸運, 冇人叫我忍住唔好屙, O係產前房都係一路急一路屙, 唔怪得細個阿媽話係屙我出黎…個感覺真係好似…
聯完針之後助產士一路同你講唔好食薑醋, 補品之類住, 講左2次, 不過我唔記得有邊幾樣唔好食…只記得自己問左佢薑飯得唔得, 佢都話唔好, 3, 4個星期後清左惡露先。
聯完針之後O係產房攤左大半個鐘, 大約5點有人黎同我過床, 其實係拍張床O係隔離, 自己褪過去, 丁叮磅重度高度頭圍打針之後抱返黎你身邊, 一齊上房, 出去嗌返老公幫手拎野, 上到去又過床, 安頓好, 老公餵水, 傾幾句之後就要走, 我入房先之後老公後到, 老公黎到唔見丁叮, 我話俾人擄走左…話6個鐘後落得床先俾返我…點知6點幾就俾我餵奶…我5點幾先上房…:P
而老公就返左屋企休息休息, 我反而好精神, O係產房成個鐘都眼光光, 聽隔離房生仔同講野, 之後7點食早餐, 8點巡房, 10點前要小便(6個鐘頭內)所以生完要係咁飲水, 同埋其實都好渴, 我飲左2壺…第一次去左400ML…
生仔記講到呢度~遲D再分享醫院連餵5小時奶冇覺好訓湊仔記~

照燈

day4到依家day19已經入左醫院3次, 每次都係黃疸照燈…
開頭出世check黃冇事以為佢咁叻仔, 臨出院o個日話可能要抽血, 點知都係唔駛可以返屋企, 點知day4返健康院就check倒黃要即入拿打素, 去到326咁高要照大燈, 第二朝去探佢仲有2百尾, 點知4, 5點就收倒電話話可以回家渡假, 當時落到217, 第二日返去覆診220都可以出院, 隔日返健康院又高返, 返拿打素check又27x照雙燈, 今次照左3日, 222回家渡假, 覆診199唸住好啦~隔幾日返廣華兒科醫生見佢黃又check…今次29x…返左屋企又帶返佢入院…幾驚要換血…好在都係照3燈, 第二日雙燈, 第三日單燈, 唸住今日可以回家渡假, 點知又高返幾度228…

今日特登一早去餵奶寫簿等醫生, 等左3個鐘先見倒醫生…問返d驗血報告, 全部冇問題, 醫生話初生嬰兒黃疸一般幾日就退, 不過有少數bb會難退d, 佢o係醫院已經係食奶粉又照住燈都唔退…唔知聽日返得屋企未呢…


講返呢幾次住院經驗, 拿打素好似酒店, 環境好, 姑娘比較清閒, 好有耐性對bb, 慢慢餵奶慢慢教你, 3個鐘食一次, 丁叮每次食倒80-90ml( o係屋企食唔倒咁多), 廣華四個鐘餵一次, 醫生照佢體重計俾80ml佢食, 即係比之前食少左160一日…我第一次去探佢見佢糠喊左一個鐘先有奶派…好快就食晒一支90ml…尋日第二次去, 喊左45分鐘5, 6分鐘就食晒一支90ml…仲嘴郁郁…不過阿姐話佢3點幾o個次唔覺食得好好…有d難先餵完80ml…今日第3次探佢, 餵朝早10:45o個餐, 都好快食晒90ml, 但冇6點食得咁好, 到左3點o個餐就最難餵, 係咁扭唔肯食, 泵左支120ml人奶俾佢, 漏下噴下都食倒90ml…

拿打素探病時間媽媽係24小時, 爸爸就12-1同6-8, 廣華因為佢訓箱要入房, 所以除左每日4次日頭既餵奶時間, 父母都係得6-8可以探, 今日10:45去到簽紙見醫生, 餵完奶就出返去等到2點…又谷又餓又渴…泵埋奶落去買支水買個包就上返黎餵返正話支奶…懷疑係唔夠熱, 雖然阿姐同我座左陣, 不過食到扭黎扭去, 今次個阿姐又包得唔紮實…好難餵…之前2日o個個明顯包得好好多…

其實間間醫院都有好有唔好既staff, 呢度都有好肯教我又叫我唔好冷親既姐姐同姑娘, 但亦有d感覺唔太友善既, 而且呢度似乎比較忙, 佢地餵奶都好趕, 係咁塞阿b食…

今晚係第一晚冇去探仔, 唔知佢食得好唔好呢…有冇爆喊一個鐘呢…爹爹今晚都去唔倒探佢…我地都好掛住佢呢…唔知佢聽日捨得出院未呢…


仲有廣華既單燈同拿打素又好唔同, 廣華都係o係個箱入面, 同雙燈三燈一樣, 要蒙眼…丁叮好唔鍾意成日整甩…拿打素單燈只係訓床, 照背脊唔駛蒙眼, 次次去到都食飽飽訓得好lum…上面2幅就係拿打素照單燈中

當日係兒童節, 我同佢講爹爹媽媽一陣走佢就笑…我話兒童節都唔冇得返屋企佢又笑得勁開心…>< 住酒店好歎啊可~~~ 廣華就唔同喇, 次次去佢都蒙住眼, 一係就餓到喊, 好似軍訓咁…>< 今次仲住4日添…希望佢快d出院, 之後唔駛再返黎啦…好掛住你呀寶貝…

你看我像誰?

你地覺得丁叮似爹爹定媽媽呢?^^

一出世老公就話好似我,果然同超聲波睇倒既一樣, 鼻同嘴同我一模一樣~~不過未開眼始終唔知似邊個, 到左半夜時份終於見佢開眼喇~不過得一條線…等左幾日間中開大少少, 不過似乎都係眼細細呢~~老公話面型似我,尋晚睇返我bbd相原來唔似,不過老公都係面圓圓, 可能因為丁仔瘦, 所以長d, 耳仔勁貼,我地2個都冇咁貼, 放左幾張相上fb,個個都話似爸爸, 但係出院O個張又話媽媽餅印XD 老爺又係話似我, 婆婆就話2個都似, 尋晚睇返我地D BB相, 得出結論係上半似爹爹, 下半似媽媽, 即係眉眼額似爹爹, 鼻嘴下巴似媽媽,仲有手指腳趾長長都係似媽媽^^又同我樣鍾意晾腳~不過幾多樣似我都冇用, 眼仔似爹爹我已經輸晒>3<

多謝各位^^ 丁叮出世喇~~

經過23小時陣痛, 丁叮已經o係3月25日凌晨出世喇~重2.97kg,返左屋企一個星期冇覺好訓, 我已經輕返6kg,仲有2.5kg就返家鄉…
丁叮尋晚第二次入院照燈(黃疸)依家終於有少少時間上黎同大家報喜^^

day0 兩隻小丁叮合照

day1 全家福

day2 出院喇~

返屋企交豬喇~

太多野想記低, 不過趁丁叮未返, 要爭取時間訓多d喇!