老公的馬卡熊

婚後第一天上班便接到噩耗，致電告訴老公跟媽媽。

媽媽說：那便回家吧。

老公說來陪我吃午飯（那其實是他要上班的時間，那天為了陪我遲了上班）

那天實在沒心情，就在附近的大快活，兩個人吃一個快餐，好像是韓式炒年糕。

老公遞給我一個小小扭蛋，原來是馬卡熊。^^ 雖然很沮喪，但你的心意我全收到。

正打算展開回禮事業，老公也支持我，正好收到這隻小熊。^^

我不知道要是發生在婚前，情況會否一樣，不過我很感恩這個機會，讓我那麼快便感受到有老公支持的窩心。

還有媽媽的反應也令我感動，那時候媽媽也失業了一段日子。

當然還有朋友的支持，有同事為此而哭，有朋友說要幫我留意行情，也有同事為我說好話，替我不值；在重新得到機會後，更有朋友錦上添花請食飯。^3^

我知道我的失意時間比很多人來說其實很短，6月21日受到打擊後幾天便開始寄信, 然後大約2星期後開始見工, 第三份便成事了，更在出發往蜜月前接獲好消息。

因著這個考驗，再一次反省自己，其實一直知道自己有問題，一次又一次反省，似乎一次又一次鬆懈。還是沒有長進。希望這個新開始，可以再給自己一個重新做人的機會。

也因著造個考驗，衝出了困局，踏出了第一步，多謝各JM的支持。

炒貝殼粉+蒜豉雞球

好耐冇post過晚餐~

其實嫁左之後都好少煮飯:p 冇出街又自然唔想出去買送, 出街又唔返屋企食… 都係阿媽煮多…

呢個星期返返工終於煮左幾餐~

早幾日買落樽蒜蓉豆豉醬, 真係幾方便, 用左黎醃雞, 買左3塊雞扒切件, 撈勻醃一陣。

青黃椒炒都近熟兜起, 炒炒焗焗d雞再加返d椒落去兜勻上碟, 再埋一埋個芡~搞掂~

貝殼粉原本唔係唸住咁煮, 炒左粟米蜆肉火腿唸住整奄列點知太大兜, 唸住就咁食, 唸唸下不如加埋d貝殼粉啦, 於是先烚粉, 瀝乾再兜埋落去炒, 加d雞粉, 酒, 蒜粉, 炒乾, 搞掂~

榛子馬卡龍

繼續馬卡龍練習

今次帶左去朋友屋企開PARTY~

中間夾左榛子餡~好味~:P

但都仲有幾個只有一邊升起, 點解呢?

829malau山窿大食會

數數下今次原來已經係第7次相約masa/紅豆jm!個別jm仲唔只見左7次!

繼上次黎我屋企「袁太茶聚」之後, 今次似乎更似阿太茶聚~ 聽住悠揚樂韻, 捩住酒杯底~

睇下我地既食物幾咁豐富, 有pizza, 有我至愛既巴馬火腿配蜜瓜(據說以為係哈密瓜, 切開左先知係綠色既XD一樣咁好味~~)仲有泰昌蛋撻+沙翁, 三磅香蕉焦糖mousse cake,

 主角-紅酒, 仲有白酒同好好味既有汽蘋果汁~

我預備左台灣腸、雞軟骨同榛子馬卡龍~^^

就係佢令我遲到左成個鐘>< 真係唔好意思呀咁多位

飲勝~~

malau試左佢既4寸婚紗鞋~(點解唔見左張鞋相既=.=)

我地有蕃薯做PR, 好乖好輕

我仲入左房扡nicky~^.^(同場加映逐走蕃薯)

究竟佢地睇咩睇得咁入神呢~?A.A

好鍾意呢個corner

MALAU靚相

PPo係最適當既時間返黎, 同我地影左好多張大合照~

我地今日睇左輯好正既婚紗相, malau即刻把握時機同pp話要影多輯XD

2點玩到7點, 時間過得好快, 一班女仔傾下影相, 講下新聞, 八卦下渡過左一個愉快既下午。^^

多謝晒malau山窿各位熱情既招待~^0^ 打搞晒~~~

希望肥豬有機會同蕃薯玩啦~^.^

macaron練習

同一日既練習, 綠茶之後做左粉色, 全日總共做左3次。

第三次轉左食譜, 成份比例有d唔同, 另外爐溫高好多, 做法亦有分別, 打起晒蛋白先加粉再打, 有裙, 不過又打得太稀。

睇返angel既做法, 原來佢打到起泡就得, 而亞B都係話打到cream狀, 有d就話打企…做咩之前咁順利依家咁架, 時間無多要加緊練習至得!.\/.

特大PIZZA(開估)

尋日買既材料就係整左呢D, 另外其實唸住整個加貝殼粉既酥皮湯, 酥皮係之前整落既, 拎左出黎解凍, 點知阿媽返黎話煲湯, 我就冇整到喇…

好耐冇整過PIZZA~~
餡料有沙律醬、吞拿魚、菠蘿、番茄、洋蔥、腸仔、車打芝士~
冇買到PIZZA芝士~成50蚊包好貴=.=
個邊好脆~^皿^
不過落少左芝士, 焗完唔見晒, 食就食倒

一開十二, 阿媽食左2件, 我4件, 老公食左6件XD即係半個!

今次個皮係麵包機搓~大熱喇搓包 ^^
高粉250G, 水130G, 依士2-4G, 糖12G, 鹽2.5G, 菜油12G
200-220度焗15分鐘倒

greentea macaron

最近常造馬卡龍, 可惜好唔穩定…明明之前已經好順行…做咩會咁架

近排既綠茶同朱古力係最成功既, 2隻都冇加色, 用左味粉。

今次既綠茶口味, 第一爐順利, 第二爐又爆…咩事…

估下我煮D乜?

放工去百佳買左呢D

原本唸住煮2樣野, 最後只係煮左其中一樣

估唔估倒我煮D乜呢~

其實呢度唔係全部材料, 仲有D屋企既存貨。

(開估)

苦海孤雛

細個最怕既係阿媽死。

唔知點解我細細個已經成日好怕阿媽死左我唔知點算。

有次阿媽買送我死都要跟埋佢去，明明之前都係一個人留o係屋企冇問題個喎，o個次喊晒扭晒計咁，結果阿媽要綁住我o係床邊…當時大約4歲。

有次半夜起身唔見左阿媽，得返自己一個o係屋企，其實都知佢出左去玩，不過又係喊晒咁打俾鄰居，通電期間阿媽就返黎。當時大約6歲。

有次阿媽入左醫院，佢早一晚已經預告話佢好肚痛，如果訓醒唔見左阿媽就即係入左醫院，結果真係唔見左…之反幾日老豆同大伯o係大陸返黎睇住我，我就呢o係被入面喊…當時未夠16歲唔俾探病…唔記得幾耐冇見過阿媽，有次放學見倒阿媽著住病人衫，原來佢偷走返黎見我…當時都係初小咁上下。

有時睇睇下電視會喊，因為阿媽遲遲未返驚佢有事；有時會唸阿媽其實會唔會已經死左，我一直見住既係鬼魂。

偏偏阿媽又貪玩，成日叫佢早ｄ返，佢都話「好呀～聽朝一早返XD」嬉皮笑臉咁回應我…

 

打左一大段，其實我想講，菲律賓脅持人質事件當中既小姊弟一夜間失去雙親o個種徬徨，就係我細個最怕既感覺。（長大左都怕，唔敢想像有日母親離開我會係點既一回事，雖然我地有時唔係成日見，而且見親面都要頂嘴，老公都頂我地唔順，但係呢ｄ就係我地相處之道，轉個頭就有傾有講。）相比依家，失去母親都只係不捨，但係小姊弟仲多一份失去支柱既無助…

聽講人係會在乎兒女多於父母，失去丈夫同２個女兒仲要照顧唔知情況樂唔樂觀既兒子既梁太好令人難過，但係可能未為人母，相比梁太，小姊弟既情況令我感受更深。

假如係你你會走嘛?

早2日同老公討論菲律賓脅持人質事件, 佢話佢有朋友話如果個槍手放佢唔放佢老公, 咁佢都唔會走。

老公問我，俾妳妳走唔走

我明白點解佢朋友唔走, 但係我又覺得, 個槍手講咩都唔好逆佢意, 根本唔到你揀, 佢唔係問你意見…佢係叫你走…你點知佢會唔會覺得自己一番好意你唔領情發難…之後睇報紙都話應該盡量配合。

老公話：係喇！妳應該走！妳o係度盞我仲要照顧妳…

我又問返佢：咁如果個槍手放你唔放我，咁你走唔走？

老公話：我唔走！或者同佢交換留我o係度放妳走。

我話：有得咁既咩…

 

其實今次事件當中，生還既家屬絕不比離去既人好過…

好似梁太話齋，如果唔係要照顧小朋友，佢都想攬住老公一齊走…依家知道２個女都走埋…如果唔係仲有個仔…我真係驚佢會做傻事…

如果冇小朋友，攬住老公一齊走我相信係好多人既選擇，但係有冇唸過，你唔係淨係得呢個另一半，如果你真係有得走唔走，最後２個都冇左…剩返雙親o係香港邊個照顧…?再俾我揀我都係會走，我仲要返黎照顧媽媽同老爺…

梁生英勇，梁太亦好堅強…以後漫漫長路，家破人亡…仲要照顧唔知康復進度如何既兒子，條路有幾難走唔難想像…

 

另於主blog有一篇相關感想名為苦海孤雛

布達佩斯的味道

把舊有的食具, 布達佩斯的早餐帶來, 陪伴我面對新挑戰!

布達佩斯的美味早餐~

第二天開始帶飯, 自煮便當~台式肉燥飯、白飯魚炒蛋、沙茶火腿炒蘿蔔

FW: 有仔&quot;難&quot;嫩生

有仔"難"嫩生
任誰都明白有仔最好趁嫩生，不過香港女人有苦自己知，要在30歲前的黃金時間及時生育，現實又談可容易？

最近，家計會執行總監范瑩孫醫生慨歎時下的香港女性，在30歲以前往往以工作行先，希望等到有車有樓兼儲好足夠金錢之後才肯生仔，不過到時想生就未必可以如願以償。其實，除了經濟和事業因素外，范醫生還漏了一個最最最重要的原因──就是男人。 香港地女多男少，在十多廿歲時要找個男朋友拍拖或者不難，但一去到談婚論嫁的地步，當中要經過的波折和困難，就未必是兩、三年所能解決。就算當妳順順利利成功結婚，一想到生兒養女，又會是夫婦之間另一個世紀大難題。 環顧身邊一眾3字頭，不論已婚、末婚、單身、離婚、一腳踏幾船、女同志、剩女、情婦、敗犬等各種不同身份、背境與遭遇的香港女性，基於女人與生俱來的XX染色體關係，大多數都十分喜歡小孩子，不過事實上，當中卻只有少數真的會選擇生育，當中最普遍三大主因都不外乎是是男人、經濟、事業和進修。

1.男人
如果身邊的男人並不是理想的父親人選，甚至根本末有這個人出現，又或者這個人本身不想擔當這個重任，作為女人又實在無可奈何。

CASE 1：32歲的Joyce跟老公結婚4年，有樓有車，兩人的收入亦不錯，一切似乎已準備就緒，偏偏老公是個貪玩kidult，講到明怕有了小孩之後自己就不能再過自由自在的生活，他寧願選擇打機也不想湊仔。

CASE 2：29歲的Gigi原本有個拍拖7年的男友，並已經計畫好年中結婚之後立即實行造人大計。不過，原來男友去年出差時結識了一位22歲的上海女子，結果二人分手收場。現在Gigi距離30歲只剩1年時間，正所謂夠療傷得來又趕不及識過另一個男人，就算有緣有份火速拍拖結婚生仔，十月懷胎得來都已經過了30歲。

2.經濟
當大多數夫妻都要用「公一份婆一份」的方式才能維持到供樓、還債、交稅、供養雙方父母的生活時，生仔就更加百上加斤。尤其兩人都要出外工作的話，自然要請工人湊仔，另外還有小朋友的日用品、奶粉、日後的學費和附帶的一大堆昂貴興趣班費用等，都令很多夫妻不敢生育。

CASE ：Tina與丈夫兩人加起來月入近4萬，看似是不錯，但其實單是房屋租金已佔去其中$15,000，其餘的要應付衣食住行等各方面，每個月都所剩無幾，而且他們都一心希望為孩子提供一個理想充裕的成長環境，以免被人比下去，因此他們結婚5年以來，仍然處於不斷儲蓄的階段，問題是Tina今年已經32歲。

3.進修
CASE  ：Cathy大學畢業後就到美國攻讀碩士和博士學位，之後返港又繼績做研究，前年終於獲得大學助教一職，而且還認識了男朋友，已經打算明年拉埋天窗。不過，以她36歲之齡，在懷孕方面已經比較難，加上丈夫亦已經45歲，所以二人都擔心與孩子的距離會很大，所以遲遲未決定到是不是不生育。

儘管，很多渴望成為母親的女人，都要面對類似以上的種種現實問題，但社會上依然有不少例子作了最佳示範，例如林青霞、黎姿等就是成功的高齡產婦。其實高齡產婦的定義是指35歲以上懷孕，而困難和風險是由於卵子在卵巢中儲存太久，加上母親的體能也不及30歲前壯健，因此高齡生育對母親和BB來說都有一定危險。

不過，目前在香港，每5個產婦就有一個屬高齡界別，雖然醫學界認為高齡產婦生唐氏綜合症BB機會比適齡產婦高 ，又較容易有妊娠高血壓和糖尿病，不過香港勝在擁有先進的醫療輔助，加上當女性在心智成熟、經濟條件較好以及安穩的生活環境下生育，對自己、家庭和BB方面也末嘗不是一種有利的優勢，只要在決定生育前進行詳細的身體檢查，小心調理好身子，懷著開朗的心情懷孕，一樣都可以成為健康快樂的母親。

新一天

放左個幾月長假, 今日第一日返新工~ 預早一個鐘出門口, 早左半個鐘返到~

暫時未多野做住, 一路做住同以前差唔多既工作, 一路聽倒似熟唔熟既聲音, 好掛住以前既同事。

除左相熟既戰友, 對於其他共事五年既同事, 熟悉既笑聲, 亂up野, 互相取笑既歡樂, 都令我懷念。

黎到新環境, 似乎一切都相當唔錯, 只係工作時間比較長, 但實質返工時間仲未知。

第一次失業, 第一次面對別離…失業同失戀似乎真係有共通之處…

始終相處左咁耐, 點都會唔捨得…

被放棄既時候, 難免懷疑自己價值；雖然有信心, 但係始終會感到徬徨…

好好彩, 唔駛一個月就搵倒新工, 亦o係我出發前接獲通知, 令我可以安心去旅行!

o係新既地方, 要重新學習待人接物之道。我唸, 呢樣先係我最需要學習既技能。

美少女戰士

那一年, 我開始學人買套裝閃卡, 開始接觸漫畫及動畫產物, 開始自己有錢買呢d無謂野

事隔多年, 最近知道j2重播, 不過次次都撞唔o岩時間, 頭先咁o岩睇倒少少, 講到亞美o岩o岩成為戰士~

睇返以前既卡通, 好似青春左, 返返以前少女時代 ^^"

聽日開始返工喇, 冇得睇lu~

大發現

依家yblog留言唔駛打編碼咯喎!

一定係發現左冇用…一樣咁多垃圾留言…

依家留言俾人真係爽左好多~

Pandan macaron

Pandan macaron

上次d朱古力好成功, 今日整班蘭又麻麻

用左班蘭香油, 幾好味喎~

商戶評分~masaLiLi

舊年2月開始籌備婚禮, 第一件事就係婚照, 遊BLOG期間發現masaLiLi, 連一向覺得婚紗相唔靚既老公都覺得唔錯, 而且落訂唔駛俾訂金, 於是4月就落左訂, 過幾日仲指定埋攝影師--Roger!

今年2月同埋另外2pair香港jm一齊o係台中影左我地既合照, 雖然只有4張, 但係我地都覺得好好玩好開心~

呢次masalili夢幻之旅, 我返左香港一個月都仲念念不忘, 比蜜月更令人回味~

masaLiLi仲令我認識倒一班好姊妹~ 佢地賞面出席我既婚禮, 阿shan更主動幫忙做司機! 佢比我更緊張! >333< 我地仲已經指腹為婚~(雖然肚都未有XD)

過去已經分享左好多, 今次黎個評分。

攝影師-ROGER
冇得嘆啦~roger當時貴為masalili首席攝影師, 好在我早訂, 唔係都冇我份~!
老公十分滿意佢影既相, 真係如其他前輩所言, 唔駛執都咁靚! 我地執都只係執瘦呀~執滑皮膚, 同埋有D飾物要修補咁XD
當日天氣好差, 又凍, roger都幫我地影左220張~~ 我地由9點開始化妝, 之後大約12點倒出發影到夜晚10點~!
不過依家roger已經離開左masa, 大家要搵佢或者我下次搵佢影周年照就要去佢既新公司紅豆．婚紗喇~~

化妝師-Mandy
其實mandy都好好~ 好溫柔~好可愛~ 化既妝好靚~ 痴雙眼皮技術一流~!
出發之前都聽過有d人對mandy評價麻麻, 而我自己呢, 5個造型之中有2個麻麻地鍾意, 同我揀既衫同佢襯既髮型都有關。
首先我好鍾意黃色呢件eg, 不過我實在著得太肥…而夾上去既曲髮亦有d娘；藍綠色呢件估唔到係襯呢種髮型, 我好唔鍾意梳晒上去同埋咁蓬鬆既髮型…

但係其餘3件, 包括2件白紗同一件藍色修身晚裝既造型我就極之滿意~! 甚至用左黎做我bd既參考照片。 我bd既妝同髮型都係照抄mandy幫我化既晚妝同第一套藍色晚裝既髮型!

燈光師-小毛
小毛係roger既徒弟, 佢打既燈完全唔駛roger指導, 自動自覺就知道去邊個位點樣打, 佢2個配合得天衣無縫, 仲幫我打造陽光~!
另外小毛既服務質素真係無懈可擊! 佢幫我搓暖條頸鍊先戴既細心真係讚十次都唔夠~!

其他工作人員評價見此

後製部
雖然之前一直有說後製部門很多問題、修片很差之類, 不過我好好彩冇遇倒咩問題。
頭2次分別修左8張同12張唔同既相, 之後第三校差一張對方誤會左而需要再執。每一次大約一星期, 最後一張只需2, 3日就可以輸出, 由拍照到收相只係2個月, 仲快過香港影。我地冇upgrade做美編, 因為我地都覺得d相先最重要, 唔需要花錢o係美編上, 而且一幅相佔一頁會睇得清楚d。
可能我地之前聽講修片唔多掂, 所以都唔會要求修太多, 我地要求既都做倒。
我跟客服kelly要求第一校跟底檔的小檔一同傳送給我, 因此拍照後不久便收到所有照片, 不用等到最後收相時才能看到沒有入相簿因而沒有線上校稿的相片呢~

運輸部
好早就送到, 於是改左送去公司, 朝早9點幾就收倒!
雖然漏左個皮箱冇送黎, 不過可以跟埋朋友既相一齊後補都唔錯啦~

網上客服
我係由kelly跟既, 基本上都係幾有禮, 幾溫柔, 對於我無數既提問亦樂意回答。未影相前覆得比較快, 影相後就一般6點(即佢收工)前先會覆, 而我試過下晝問佢係會覆得比前一晚問快XD 但係對於部分問題佢會好官腔咁回答, 有D 優惠呀, 相簿呀佢都會叫我地去到先睇…答左=冇答我就唔係咁欣賞。不過呢D可能都係公司指引啦~

景點
時光迴廊、旅人行館、MASA內景
其實我從來都冇唸過去台灣影相, 因為部分仲係有D娘既感覺, 同大陸影, 其實可能係一線之差…我地黎呢度亦唔係因為呢便D景靚, 我地揀既「時光迴廊」只係一間舊既大屋, 不過我同老公都一致睇中呢度。而旅人行館係因為睇左曲奇同樣係去時光迴廊, 但就可以去埋分公司旅人行館影內景所以同ROGER提出, 呢個景亦都好滿意, 而且O係度影係最溫暖既, 比MASA部分露天內景暖得多~ 亦有地方可以換衫去下一個景點(因此我只係O係車度換左一套衫, 真係幾"laugau"…)masa內景方面我較鍾意之前未搬位既佈置, 不過冇計, 總係要換下位。

整體黎講我係好滿意masalili既, 不過由於我最滿意既一part--攝影師走左, 所以我都會跟埋佢去新公司, 亦會介紹人去新公司。 不過始終新舊同大細規模都有影響, masa始終比較多內景, 員工亦比較多, 比較有系統。而紅豆就較平(其實MASA都唔係貴, 不過聽講台中黎講算貴), 同埋紅豆2位攝影師係MASA之前既TOP 2~ 有質素保證!

以下係其他相關文篇

2010-05-03masaLiLi謝卡
2010-04-19Pre-wedding by Rex(黑白EG篇)
2010-04-18Pre-wedding by Rex (WG篇)
2010-04-16收貨喇~~
2010-03-28等待
2010-03-17masaLiLi-my hairstyle
2010-03-10紅豆．婚紗
2010-03-09小企鵝在masa
2010-03-09遺珠
2010-03-06masaLiLi-my gown
2010-03-06第一校!
2010-03-01masaLiLi禮服
2010-02-18 masaLiLi揀衫~
2010-02-22 挑片報告
2010-02-26 任務完成(後記加入)
2010-02-28 心仍未返
2010-03-01 黎客商旅
2010-02-13 masaLiLi reference book
2010-02-10初遇masaLiLi
2010-02-05masaLiLi溝通單
2009-10-29masalili預算表
2009-04-17masaLiLi 已指定攝影
2009-04-12時光迴廊~聚奎居
2009-04-11MASALILI下訂
2009-04-03台中 masaLiLi