布達佩斯之旅-啟程篇(相片加入)

我自己好鍾意既一幅相^^

報時
依家係凌晨 5:24
半個鐘頭前醒左, 老公仲訓緊^^

首先由出發講起

7月19日晚上7時出門口~老公仲要返工，我地相約機場等～食左BURGER KING, 行下街, 都仲要等成個鐘先上機:P

2330準時起飛~ 前往慕尼黑! 第一次衝出亞洲~~~

搭乘漢莎航空, D餐都幾好食~ 幫老公訂左兒童餐^^" CHECK IN COUNTER個姐姐第一句就話: 你地冇order到兒童餐家嘛? 我話, 有呀 ! ^^ 上次去台灣影相時, 同事教我訂兒童節目餐話好食d, 老公見倒d野又o岩口味又有禮物(史迪仔文具套裝, 佢自己既低乳糖餐定清淡餐連杯野飲都係水…XDDDD佢到今時今日都記得)好羨慕~~XD於是今次幫佢訂, 我自己就試下正常餐, 果然都係CHICKEN OR BEEF~ 不過都幾好味, 至少個甜品同沙律我覺得好食過兒童餐XD 至於個兒童餐呢~同港龍都有Ｄ似，早餐同樣係吉士醬pancake, 但就好味好多~ 上次我只能話佢係一pat野… 唔o岩我, 今次都係一pat野, 不過我食得好開心XD

2330機, 估唔到等左一陣就有晚餐~佢係肉丸肉醬長通粉, 我係唔知咩雞皇扁意粉(原來係: 蘇黎世雞肉配意式細扁麵), 兒童餐好食D~~~同埋佢漏左我個餐 :( 兒童餐跟一盒維他橙汁~另外每人有杯野飲～　另外有沙律同甜品, 老公見倒有布甸好開心ＸＤＤＤＤ但就冇玩具~~ 佢地係見細路先派既~~XD

食飽飽就訓啦, 電視冇咩睇, 有好多戲, 不過冇字幕>< 好在俾我搵倒個華語歌曲台, 另外有個探戈音樂都幾好聽, 一路訓一路聽, 大約香港時間2-6訓醒後就開始做功課~
之前一路講話買左幾本書都係係咁2睇過, 今次就拎晒紙筆jot note喇~

之後大約落機前個幾鐘就食早餐~ 我有德國雞肉腸~:D~~~ 仲有個味道唔錯既蛋餅~

大約5:10分鐘(即香港時間11:10AM)就轉機, 搭左唔夠12個鐘, 不過已經係我搭過最長途既飛機~! 上次去哈爾濱連轉機都係9個鐘倒, 不過就細機…

坐咁多個鐘頭飛機, 去個廁所真係唔願出黎, 平時甚少去飛機廁所, 今次呢個有好多格, 仲要落一層, 入到去好闊落呀…屈O係個位到真係好辛苦…轉黎轉去…仲熱醒左…唔知係咪我個位熱, 我見中間D人可以COM被…=0=

去到德國機場轉機, 個幾鐘就上另一班機, 過關時個關員係咁望下我又望下老公, 問我去幾多日布達佩斯, 我又淨係聽倒布達佩斯答佢YES XD 問多次how long…我先識答佢9 or10日, 我都唔知點計, 9定10日, 跟住老公問返我佢問我咩, 我話「點解佢係咁望你」,佢話「佢見我好緊張, 我驚佢唔知問你d咩」XD

跟住check行李呢, 嚴過香港好多, 我見d人要除晒褸, 有d除剩背心, 同香港一樣, laptop要拎出黎, 有冇人知道點解? 我個袋過左2次, 之後充公左我包維他奶>< 我唸住飛機拎既冇問題嘛…可以o係等轉機時先飲。老公就要打開晒d相機鏡頭俾佢睇。

經過好多鋪頭, 不過太早未開…想試德國傳統手腕包, 不過更想食德國香腸, 點知搵唔倒, 最後2樣都試唔倒=.= 我回程一定要試呀~~(結果o係布達佩斯試左, o係德國機場都係冇試到)

lufthansa登機閘口有免費咖啡~飲左杯mocha~ 都幾好飲架

2班機都好full, 第一班機一上機有小朋友"爆喊"(老公既用詞XD) 好在只係到落機時先再喊, 唔知係咪同一個。第二班係細機, 我地個窗口位原本有人, 點知咁O岩冇黎到~~上一行就已經係商務客位~ 一簾之隔XD 今次我地有2個包~一個火腿包一個芝士雜糧包, 2個都有醬, 好味喎~~ 前面商務位就好似食粟米片, 同埋裝野飲既杯同我地唔同。

第一程機用動畫講解救生方法, 第二程就真人示範。

唔通呢條就係多惱河~!!? 有幾條橋個喎!!

個幾鐘後, 終於黎到目的地喇~>0<

有位阿叔同我地講唔駛PASSPORT, 拎行李就得~原來佢係台灣經香港運貨黎既, 佢D貨真係多到@@ 有成十幾箱…一個人點搬出機場… 佢就係我地黎到布達佩斯第一位遇倒既華人喇~

跟住機場唱左D錢, 1EURO VS 254FT, 再去ZONA TAXI搵人打價就可以搭的士去酒店, 5200Ft, 為返2XX蚊, 自動收TIPS, 俾6000抄500

終於黎到酒店, 但係我地需要等5個鐘先可以check in, 就係咁, 開始左我地既布達佩斯之旅喇~~