丁叮第四個月

7月25日, 丁叮滿四個月喇~呢個月開始經常單拖帶佢去街~~心情舒暢好多~^^

單拖帶佢行沙田~試車@沙田萬寧baby~呢架車幾好, 我前揹丁叮後揹奶粉袋單手都拎得起, 真係好吸引, 不過買左既媽媽話一個人上落小巴都係麻煩, 屋企又有2部車, 加上老公反對, 都係放棄喇

玩具反斗城試坐~
佢訓緊俾我捉佢出黎試…又幾ok喎~不過好明顯唔坐得耐…打算買吹氣o個張~大張d又可以收埋又平d

6月尾返廣華覆診, 話說未出世時照結構有d小問題, 出世再照, 今次覆診見埋醫生, 冇事唔駛再返黎喇~ 不過那打素跟進既黃仲未搞掂

丁叮出世後第一次病, 話說之前大肚時病過2次都冇食藥, 係一次腸抽筋入急症食左2粒必利痛, 今次勁咳, 睇左2次醫生, 結果連訓覺都要戴住口罩…好在冇傳染俾丁叮~

第一次同爹爹慶祝生日~

百日宴~好彩冇擺滿月, 百日真係好好多, 雖然佢都有扭, 但返到屋企又冇野, 反而係我預備佢既蛋糕同馬卡龍比較辛苦, o個2日佢勁痴身…好大壓力, 亦好擔心接order分唔倒身, 同老公傾完, 發覺唔可以俾佢控制晒d時間, 於是有日由佢喊唔抱佢自己o係廳整餅, 時間真係好用好多, 再後來擺返佢o係我身邊既highchair望住我整餅, 佢又好乖唔扭, 乖乖望住我^^

呢個樣真係超乖~~成日有人話佢個樣好乖^^ 其實都係既~

一家三口去海濱公園, 雖然住得咁近, 不過對上一次黎已經係09年影婚紗相…當時婚都未結, 再黎已經帶埋小丁~

呢個月開始學識食手, 不過佢又唔算十分鍾意食, 都係代替唔倒奶嘴, 而佢又學識拎走個奶嘴, 一拎走又嗌救命……有時塞得返入去, 多數塞唔返…

每晚同爹爹既親子時間~最鍾意坐爹爹肚dum再用腳撩佢塊面~XD附送大量口水~~~

初生時唔鍾意洗白白, 次次都爆喊, 我試過自己戴耳塞先同佢沖…依家已經好ENJOY喇~ 第一次洗泡泡浴~ 後來發現之所以爆喊可能係每次訓醒就捉佢沖涼, 驚食飽先沖會嘔, 當時又未有定時餵, 佢訓醒就食, 通常都餓醒…餓住沖就喊到拆天…^^"

學揸野後鍾意捧住個奶樽, 不過要飲到尾先得, 未識用力, 如果要俾佢自己揸住飲, 睇怕要換返CHUCHU嘴, 唔係一面都係…

除左一個人帶住佢出去行, 有時亦會約埋其他媽媽同BB, 呢班係最早識既~丁叮最細~^^

呢日大埔媽媽聚會, 有十幾個B, 第一次食其他BB既手手~~~XD

同爺爺去飲茶~呢張我好鍾意^^


出世以黎第二次打風, 十號風球下, 好多bb都冇覺好訓, 佢就訓得不知幾好~

又過左一個月喇~依家踏入第五個月喇~時間過得真係快~ FTM既生活令我不知時間, 原來已經放照暑假~ 過多4星期又放完假喇~呢個月出街開始, 我總算開始enjoy ftm既生活~^^ 丁叮大部分時間都好合作, 乖乖望住我做野, 今日就乖乖望住我執佢個衣櫃, 呢個月開始同我地訓, 因為唔想起身執奶嘴, 同埋可以捉住佢對手唔好捽眼…近排開始夜晚訓覺要我抱一陣, 好在好快訓著, 不過夜奶依然係時食時唔食…尋晚我3點幾搞掂晒d野先訓, 佢4點幾就喊食…跟住7, 8點又食, 一支奶分2次食, 加一次難得喊換片…差唔多每個鐘起一次身…好在唔駛返工…唔係命都冇…不過下晝都冇補眠, 同佢換過衣櫃d衫, 洗下衫晾下衫, 褶左2機衫, 泵奶, 就冇左一日

4個月返健康院打針, 體重6.33kg, 比出世時2.97重左一倍有多, 達標~雖然比其他同一日出世既小朋友輕, 不過我地已經覺得佢啖啖肉喇~
依家著緊6個月既衫, 3個月既過頭笠極難著…佢最唔鍾意老笠…

7月23日

我一歲生日喇~
舊年7月23日爹爹媽媽送完貨, 帶左我返屋企, 因為我對眼改左丁叮呢個名~
之後媽媽將朝早發現既好消息話俾爹爹知~
夜晚出去食飯等車時, 爹爹摸摸媽媽個肚嗌"丁叮"
自從有次媽媽同丁叮去睇急症之後, 每日返工去街都帶埋我, 於是我一直守護丁叮, 直至佢黎到呢個世界~
從此屋企就多左2隻小丁叮喇~^^

ANY FTM HERE?

最近愛上帶BB去街街~有冇FTM得閒平日一齊出黎行下~?^^