失眠(+近況)

連續2晚失眠, 前日訓左晏覺, 估倒夜晚訓唔著, 2點先訓著, 尋日9點起身, 唔敢訓晏覺, 點知尋晚都係訓唔著…12點幾訓著…平時我轉個頭就訓著架喇…唔知係放假訓得多還是咩原因呢?

今日返工早起, 希望今晚會有改善啦~

放左幾日假, 已經有點悶…

星期六除夕整餅, 送貨, 同老公親戚食飯都幾充實, 唸住1月1日可以休息下啦, 點知訓醒已經唔知做乜好, 結果食完野, 訓左個晏覺, 洗衫晾衫, 之後落街行左2個幾鐘, 都係冇乜mood, 買左d野就返屋企, 見倒送又冇乜睇得上眼, 好悶咁, 菜黎黎去去都係o個d, 肉又食到悶…買左袋麥方包…買左本《育兒新知》, 終於買倒新一期jessica baby(其實已經出左成個月…), 買左QV同思詩樂俾丁叮~

等老公買送返黎邊睇《天與地》邊打邊爐~

食完飯上下網, 第二日9點就醒…起身執下間離物房, 叫做執左好多空位出黎, 不過依家執野好早攰, 搬少少野都好易氣喘…執多格衣櫃俾丁叮, 不過未有洗衣液洗衫仔, 而且呢幾日都天陰陰冇陽光, 洗左機大人衫, 拆左聖誕樹, 收埋張地氈, 出年先再出黎喇~又執下房個書架, 清下D唔睇既書同舊雜誌, 3, 4點已經好攰, 又唔敢訓…無無聊又搵野食…夜晚叫左PIZZA, 薄批冇咁多包應該OK呱~:P

點解新一年放左2日假已經咁悶, 我係咪唔應該咁快唔接order同埋咁早放產假? 老公叫我織下野俾丁叮, 我又唔係好睇得明d圖…老公話咁先可以消磨時間…織得黎都要預返8, 9個月天氣凍先o岩著, 準備訂d diy kit整帽仔襪仔俾丁叮, 依家執左雜物房, 可以搵返d布整米袋俾丁叮~

最慘係唔食得甜…整甜品得個整字…老公叫我又整代糖甜品, 我都唔敢食咁多…