丁叮生病了

一直以為餵母乳半歲以前唔會病(雖知唔一定), 估唔到四個月多d就病左:(

星期五晚老公話聽倒佢有d咳唔似瀆親o個種, 星期六朝早我都聽倒, 當時只係好疏落, 不過原定一齊去送貨之後行popcorn再探爺爺既行程取消左, 爹爹送貨探爺爺, 我同丁叮o係屋企, 到左下晝爹爹返黎之後好似咳多左, 決定睇醫生, 嚴重d先食藥, 點知夜晚就咳得厲害左。

跟住2日都冇好轉, 好在唔係咳得好密, 不過一咳就不得了…尋日仲試過2次咳到嘔奶, 大口大口噴出黎…今日(星期二)更連續咳左成分鐘…決定睇另一個比較出名睇兒科既醫生, 之前食輪狀同打hib都係搵佢。

先前個醫生開左咳水同收鼻水藥各1.5ml一次, 一日四次, 今次呢位醫生開左咳水, 收鼻水, 氣管藥各2.5ml, 一日三次…仲有早晚2次腸胃藥丸, 樁成粉加水餵…每次餵藥好似搏鬥咁…頭先餵到last1支見佢谷到塊面紅晒, 跟住連埋成個鐘前既奶嘔晒出黎…><換衫途中又咳, 衫都未著好就同佢拍背, 咳左2分鐘都有…除左餵藥, 仲有佢最憎既吸鼻…原本已經差唔多每日一吸, 依家直頭要成日吸…好多鼻涕又唔識呻…打乞嚏又吊住2行鼻涕, 俾爹爹叫佢「蟲哥」…

咁o岩電視做星期二檔案, 講男士侍產假, 抱住咳到甩肺既丁叮睇住2pair夫婦準備迎接新生命, 一時情緒波動忍唔住喊, 4個月前佢仲o係我個肚, 唸返初生既佢, 依家o係我懷中喪咳…最後拍拍下背訓左…仲要o係佢睡夢同吸鼻…

又話餵人奶健康d既? 點解4個月就病架…仲要屋企冇人病…之前我咳到死, 全天候戴口罩冇傳染佢, 以為初生真係冇咁易病


好在佢精神幾好, 又玩又笑, 上個月尾學識轉左, 頭先仲o係度學轉右轉到瓜瓜嘈, 唱歌仔佢又會笑, 不過一咳就睇見佢好辛苦, 好在佢咳完又冇扭, 係食藥吸鼻扭d…

仔你快d好返啦, 呢個醫生聽講睇一次就好, 唔駛翻睇, 你要o係d藥食晒之前好返呀! ><