小天使 感謝你

媽媽為你做的一歲生日蛋糕，想了很久也毫無頭緒，終於夜半四時食宵夜時靈機一觸。

感謝你來到我們家，謝謝你對我的愛，你會望著我甜甜一笑，再伏在我身上，你會輪流親親我又親親爸爸，你哭得聲嘶力竭就為了我的抱抱，感謝你那麼需要我。

感謝你選了我們家，來讓我們成長。這一年以來日夜跟你在一起，看著你一天天長大，懂得愈來愈多，你愛笑的天性讓爺爺婆婆無法不愛你。你是我們的小天使，蛋糕上有你喜愛的玩具，和我們對你滿滿的愛。

雖然我們不是富裕的家庭，但是我和爸爸都會好好陪伴你，只想你健康快樂成長！寶貝，我愛你！^3^

丁叮一歲了~

小朋友既第一年變化之大可以用神奇黎形容！一舊粉團轉眼會行會玩會講外星話會駁嘴會打交！

你大力，
唔怕痛但怕悶，貪新鮮，唔鍾意食野只愛媽媽奶同星星餅，連心愛既奶豬都可以請人食就係星星餅要拎住走^^"
鍾意睇廣告，鍾意去街，鍾意睇肥豬！你怕醜又嗲，伸手掂一掂人跟住瞇瞇嘴笑擰轉面伏喺媽媽度^^你愛笑又愛哭，媽媽行開一陣就叫，多陣就喊到眼淚鼻涕一齊
黎，但只要媽媽一抱就收聲，完全冇哽咽，星星餅入口仲會拍手笑返...^^

今日(2013.3.25)你一歲喇，期待你學識講野，話俾我知你想點，同時亦係我既新挑戰，預左你會駁嘴！但請你禮貌地提出意見，讓媽媽同你一起成長~慢慢行得多相信個欄好快困你唔住，呢樣係我另一項挑戰！寶貝我們一起努力吧！

做左一年媽媽

做左一年ftm,呢份工唔比返工輕鬆，24小時冇病假，我呢一年病左五六次，係平時既三倍...加上小天使未戒夜奶，好在佢埋身，我都餵得輕鬆，但就冇話一覺訓天光；有order要整餅既日子壓力特別大，佢怕悶又黏我，有時太忙都覺得對佢唔住...好在老公分擔家務，尤其小天使細時，頭兩個月真係冇啖好食又冇覺好訓，嗰時佢四點先訓...(唔通因為佢四點出世???)所以我開頭瘦得好快，本身大肚重左十八磅好快回復，依家產後一年比剛大肚時輕七磅，不過就多左對媽媽手，產後泵奶好快就出現，雖然冇泵五個月，但佢愈來愈重又大力，左手情況反而嚴重左...回想產後未夠一個月有幾次想過放棄人奶，不過本住有就餵既心態，輕輕鬆鬆餵左一年，估唔到今晚仲會谷到要放奶...小天使食固體差，好在都鍾意食奶，不過只限喺屋企，佢會食下又望住我笑，食完又伏喺我度，好sweet^^更好彩既係，奶量一直夠有凸而touchwood冇試過乳腺炎。其實由懷孕開始算幾好彩，冇嘔冇腰痛身手敏捷，冇高血壓蛋白尿，有糖尿反而令我注意飲食控制體重，生完唔駛為減肥煩惱，只係個一度比較磨人，總算一切順利；丁叮黃疸到五個月先叫做退晒，但慶幸肝腎都冇問題，只係膚色黃得耐啲，同埋住左幾晚醫院，而我就因為咁坐月冇進保。雖然ftm唔比返工輕鬆，但能夠同小天使朝夕相對陪伴佢成長，成為佢最愛，係何等幸福。^^

原諒我呢一年好少開電腦...