人奶之痛

話說未結婚時已經有人話我知餵奶乳頭會損，bb會咬，到我大肚時知道係嘴形唔啱先會損，一開始就叫丁叮個嘴要大啲大啲，不過第一日都係損左，搽返母乳，照餵，一日已經好返。

到七個月第一次出牙咬我，咬左兩次，第一次我迫佢食奶唔食咬我我都算，第二次又黎，勁痛痛左十分鐘，一咬我即掌嘴加勁鬧，話好痛，話再咬唔請佢食奶，佢好錯愕咁望住我，之後一路都冇再咬，婆婆都好奇怪佢出左咁多牙都冇咬我，佢地係識聽架！

不過講到人奶最痛我唸非乳腺炎莫屬，聽講會發燒加痛過生仔，touchwood我冇試過。太多奶好易塞，所以我就算之前全泵都會控制好奶量唔好供過於求得太多，丁叮細時我泵三次夠佢食一日加日日有奶沖涼，之後食固體食少左奶再減泵，謝絕魚湯等上奶野，就係怕塞。生完第二日因為飲左好勁既上奶湯，仔又未食得好，胸有硬塊，即停上奶湯。記住唔係愈多愈好，除非你要儲冰奶返工，唔係既話平衡最好，阿b亦未必食冰奶，我仔就唔食，愈新鮮愈好味，自己試下就知。