奶媽之抉擇：泵/埋身

剛睇倒一位blog友提到有關做泵媽定埋身既選擇，分享下我自己既經驗。


由埋身>全泵>半埋身>全埋身

一開始喺醫院故然係埋身，但未上奶，每晚都食唔停，四五個鐘一甩嘴就喊，但交俾姑娘又冇事，出院前要飲兩支奶先俾出院...返到屋企食成個鐘，訓一個鐘又 喊...第三日俾左餐奶粉，第四日跌磅多加黃疸入院食奶粉我就喺屋企泵keep奶量，隨即開始泵媽生涯，出院後姑娘叫先埋身五至十分鐘再補泵奶，但次次埋完身都唔食樽，於是好快就冇埋身。期間好間中等奶暖既時候有俾佢頂下癮，到三個月開始跟我地訓方便執奶嘴，但要起身座奶，有時座完佢又訓左…支奶就浪費左…於是五個月開始半夜轉埋身，朝早仲冇咁谷，可以泵少六點o個次，然後到七個月ｏ個時食奶食得太少，一日三支五安都食唔倒…片又輕飄飄，索性轉全埋身唔掛泵，點知ｄ片反而重返。於是七個月開始全埋身到依家。泵壞既壞，賣既賣，俾人既俾人（我有三個），蒸煲俾左人，奶樽搬屋掉晒。



泵奶次數及時間分配

最初上奶階段阿仔入院我半夜都要起身泵，因為聽講半夜造奶多，但我半夜只有五安倒…於是好快冇起身泵，一日四次，六個鐘一次，跟住減朝早六點ｏ個次，一日三次，但１２點會好谷；再然後到六個月大再減多次，因為開始食固體食少左奶，冰格又打爆左好耐，唔想剩太多奶（頭半年差唔多每日剩奶沖涼…）於是由三次減到兩次，到七個月索性掛泵轉埋身。
聽講定時泵keep奶量好d, 但我仔食唔晒…冇特別keep奶量, 三個月開始經常去街, 所以都冇定時。

埋身好處

1. 抗體多
埋身有個比較少人講既好處就係比泵多抗體，奶泵左出黎抗體會愈來愈少。

2. 方便
唔駛洗唔駛蒸真係好方便，出街個袋永遠輕過人，我泵奶期出街要帶即泵冇雪過既奶（可放室溫最長８小時，時間愈長抗體愈少），有人會帶冰袋+冰奶或雪奶，仲要帶熱水座暖，我帶室溫奶都要…太熱太凍既奶我仔唔飲…全冰奶絕對唔飲，最多1/5冰奶溝4/5雪奶…出街只要有餵奶室或餵奶巾就得，我都係最近先開始o係公眾地方用巾餵。夜奶更方便，以前要座要等，等到訓著…最慘係阿仔唔等得…半夜係咁喊…老公都冇得返…轉埋身後er兩er都未醒就塞落佢口…大家一齊訓…依家大左…朝早佢早起過我，我想繼續訓又係塞佢埋黎就可以攬住訓…：ｐ

3. sweet
以前泵奶成粒鐘一次冇得抱佢，都好無奈…試過因為咁想放棄…考慮係咪值得…依家攬住食，又望住你笑，佢鍾意埋身既程度係心情煩燥食完爽晒笑晒口…見倒奶奶兩眼發光。之前想食會抓衫領，進而伸手入去，到依家會叫笑笑口奶奶…^^

4.新鮮好味
對於嘴刁既BB如丁叮…泵奶期佢係D奶凍少少唔食，熱少少又唔食 ，個奶嘴唔o岩又唔食(佢有幾款嘴…一時一樣…難以捉摸)，冰奶唔食，我自己試過冰奶真係好腥…新鮮泵既係甜甜地好食好多，人地話BB食過樽就唔埋身，因為難啜好多，但我仔最鍾意埋身…埋完身唔食樽…七個月時Ｄ片輕飄飄轉埋身即重返！

5. 安撫作用
好多奶媽話BB入院好辛苦咩都幫佢唔倒，但一啜即訓。我都識一Ｄ食奶粉既ＢＢ半夜成日起身喊，幾粒鐘唔訓…雖然唔知關唔關事，但我仔都係晚晚醒…但一啜即訓…可能因為埋身俾倒安慰佢，覺得好安心，幾唔舒服只要一啜就安心晒。泵奶雖然有營養，但就冇左埋身既安撫作用。


埋身的疑惑
1. 損
我自己生前都有呢個疑惑，唔少朋友會話你聽會整損，其實唔駛驚損，我自己第一日已經損左，搽母乳好快好。嘴形唔啱先會損，盡量丫大個口食，嘴形唔 啱用手指令佢甩嘴再重新食過，唔好俾佢淨係啜乳頭，要含埋乳暈，至於出牙咬有得教，我當時掌嘴加鬧，佢七個月個樣好似明咁，冇再咬。

2. 唔知食幾多
唔需要知佢食幾多，餓自然會揾你，唔好俾其他人既食量影響，個個bb唔同，樽餵就有呢樣壓力，細個餵丁叮餵得好辛苦，餐餐剩一兩安...轉左埋身舒服晒，片亦重左，對嘴刁b黎講新鮮係好食好多。



話說回頭…其實我泵奶o個幾個月都有人叫我埋身，點解都泵左咁多個月呢，因為丁叮食得實在太差…幾個月大都一日食12次…半夜如是…２個鐘一次…o個時病左3日唔想泵同洗就試埋身…三日後都係轉返泵…發覺奶量少左…估計係佢食得少(平時每日都剩奶)…身體調較返少d。當時中午訓醒食完都仲泵倒百幾二百，之後突然有日泵得３，４安，我就開始懷疑佢食得好左，冇耐就試埋身。

總結：如果有下次我會想全埋身。