西餅實習班(六)I~虎皮戚風蛋糕卷

切左喇~

今日早左好多返到屋企~^0^ 一來本身放早半個鐘~二來O係大埔上堂~仲要小巴站O係學校附近, 一去到就有車~^0^

餓死我…本來想去買野食, 不過小巴站實在太近~~返屋企飲左盒奶, 叮左條翠玉瓜點冷麵汁食~^0^

講返正題~

原來呢度係2個人一組一齊整, 但其實係整2份~最尾都係可以一人一個拎走既~今堂就一人一條瑞士卷拎走~~

partner幫我影既~^.^

開頭都奇怪點解要整咁耐, 原來呢度得一個爐, 一次焗4盤…要焗好多轉, 阿SIR好鬼忙, 不過我地就好多等候時間…我今日係早O個批, 整完睇下其他同學整, 有D好生手, 有D就好似助教咁~ 其實我黎之前唸住報得呢個班既同學應該都有D抵, 因為D野都唔係最基本o個d, 一黎就係有"虎紋"既瑞士卷喇~同尋日既麵包班相比, 好明顯呢堂既同學好多都識識地~我partner仲廿幾年前就學整餅@0@ 開頭好似好cool咁~後尾又幾好傾~^^ 仲教我葡撻個皮點整~^0^

今堂學倒d咩：
1. 蛋糕片出爐後唔駛倒扣就咁放涼, 之後加牛油紙蓋面防乾~記住係放涼左先加紙, 咁就唔會太乾又唔會太濕。
2. 學識整虎紋~最初以為係同個蛋糕一齊, 後尾睇譜知道係另外整, 今堂學識點整, 其實同整蛋糕都差唔多。
3. 學識整檸檬忌廉, 不過好麻煩…又要煮又要攤凍之後仲要打cream再撈埋:p 自己未必會整呢~~而且估唔到要落魚膠粉。
4. 整戚風打蛋黃唔駛打到奶白色, 而虎紋就要, 因為虎紋冇用蛋白, 如果戚風打到奶白焗出黎個蛋糕會皺。
5. 捲瑞士卷手法。

焗起左既戚風底同虎皮面~

戚風蛋糕底~準備捲喇~幾靚仔~

另外
1. 第一次用手動打蛋器打忌廉、蛋黃、撈粉~同學話用打蛋器比孤寒刮勻好多~叫我試下整棉花蛋糕時用打蛋器~不過用打蛋器勁支力…又長, 張檯又高個兜又細…比搓包仲支力…
2. 呢度溫度o岩o岩好~不過要行6層樓先到=0=同埋呢度冇粉篩= =
3. 今次個檸檬忌廉係阿sir整既~而我個瑞士卷…都係阿sir捲^^" 同尋日個芝麻卷一樣:p 我都有試過自己捲, 不過捲極都移位…阿sir只好出手相助! 亦因為佢幫我捲得夠實~之後捲虎皮就o岩o岩好捲得晒~身邊既同學都包唔晒~阿sir話因為入面o個舊唔夠實。

第二堂問阿sir

虎皮痴底--因為未涼透

虎皮唔現--阿sir叫我焗完戚風之後等一陣先焗虎皮, 等個爐熱d先<<我自己就估會唔會要5隻蛋黃先現, 最多之後再片開2片, 不過阿SIR話唔關事

忌廉餡起粒粒--加入奶時要用打蛋器快手攪勻, 唔係熟左就會起粒粒(唸起當年整蘿蔔糕…XD)