又漏水！！

2008年11月6日

又漏水! 話說佢上星期同我整完好過下, 間中好少咁滲出黎, 早幾日佢個徒弟仔黎裝減壓器(都唔知加黎做乜!)跟住順手叫佢入黎睇下滲水問題, 佢都整緊架喇, 話個駁位有鬆所以滲, 點知轉頭師傅入黎就話係咁!!@@ 我話廳o個個冇事個喎, 佢話係會有少少, 水標唔會跳… 咁就俾佢走左…點知整完之後嚴重左…呢幾日好似初初漏水咁, 跟住幾個鐘就聽倒一次放水聲…因為漏到水箱水位低過警戒線…嘈十秒八秒, 半夜都嘈醒要閂門…= = 好煩…又要叫佢整…又要俾佢拖…

尋日同業主講, 佢話你同佢講叫佢整到唔漏嘛…大佬呢d野唔駛講架馬…整水喉緊係叫你整到唔漏架啦…要講架咩???整完仲漏駛鬼你黎整呀??? 我成日叫佢搵第二個師傅, 唔憂做又求其…佢話好啦下次搵第個啦, 終於肯換人…不過今次個廁所點都叫佢死掂佢呀!唔得閒! 業主話佢仲未同佢收錢@@亦冇話佢知要換膽, 只係話裝減壓器…不過真係唔知裝黎做乜, 根本都唔關事, 裝同唔裝都冇分別!

＊　　　＊　　　＊　　　＊　　　＊　　　＊　　　＊　　　＊　　　＊

2008年10月21日

話說廁所滴水問題持續一年以上, 舊年師傅行過搵佢睇過, 之前話要加個減壓器, 要問業主, 點知一等等左年幾, 近來問題嚴重左好多, 又打俾業主叫佢搵人黎整, 佢就一味話師傅忙, 你唔係忙年幾都未排到我呀!!?

上星期催左佢之後, 業主話今個星期, 又話我唔提佢佢同師傅都唔記得, 咁星期一又打俾佢啦, 佢又係拖我, 我話師傅咁忙我搵第個整完問你收錢啦! 佢又話師傅跟開, 又話同左師傅講一陣佢買左材料!咁你唔得閒都俾個日子我丫, 我依家已經要晚晚出去關總掣! 第朝廁所都未去就要出去開返…出門口又熄返!!

結果佢俾左師傅個電話我叫我自己打去, 師傅轉個頭就黎左同我睇, 冇耐就裝左個減壓器, 不過都仲係漏, 我唸佢都預左架喇, 叫我再漏就打俾佢。

另外出面洗衣機條喉又勁滴水, 同業主講佢仲話返我轉頭, 問我做乜成地水!!! 我咪同你講左漏水囉!!跟住又話我地自己裝多左個水龍頭, 原先係得1個, 我話係上手搞既, 我地咩都冇搞過! 跟住師傅今次黎到睇完就話一係同我地轉返一個頭, 佢地係包一個頭既JE!我唸呢度全部都係佢裝架喇, D樓都係佢有份起, 所以業主要搵佢搞, 可能有D關係或者錢銀瓜葛啦, 係都要俾生意佢做!又話佢跟開, 跟咩開JE佢年幾都唔黎跟! 話如果我要KEEP返依家咁又可以洗衫又可以洗地就要自己俾錢換過D野, 其實我想要用先換個頭架, 2樣野又好少同時開既, 又話咩個頭唔O岩, 我都唔明, 跟住又催爆我話仲有其他野做!咁事旦啦我見一百蚊就俾佢啦, 但係愈唸愈唔抵! 咩包一個頭JE?我租既時候明明有2個! 我理得你起樓時係點JE?不過錢都俾左, 唔好再漏就算喇!

尋晚出去閂掣時見倒出面漏得仲嚴重過平時! 估計係佢扭過個掣之後搞成既…依家直頭未訓都要熄總掣! 開幾大佢就漏幾多!直出咁…

依家惟有裝一桶水入黎慢慢用…點知個桶都漏水= =!!! 搞咩…一陣沖涼先出去開返…沖完又出去閂…好麻煩…

師傅話聽朝黎幫我整出面個水喉…(唔駛入屋)

廁所方面, 尋晚臨訓儲左一缸廁所水, 今朝起身又冇晒…肯定唔關水壓事啦…廳個廁所冇裝減壓器都冇事! 查實都唔知有冇裝到既!好在唔係我俾錢! 依家同佢講左呢件事佢就話知咩事…尋日整完都話再有問題要成個膽換左佢!我唸其實根本就係呢個問題! 十年樓喇~廳O個個廁所早幾年都換過一次啦!呢個拖左我年幾!!

早幾個月漏水情況未惡化之前已經交緊100蚊個月水費!(我一個人住咋喎, 最多計我個半啦, 係咪貴左D呢?)我個標跳到2071, 我見樓上2層分別係13XX同18XX咋!人地2家人住架!

依家完全聽唔倒漏水聲好安心, 不過冇可能晚晚過住好似以前D人制水既生活…要用桶裝水…> <

今晚買左送想煮個南瓜意大利飯都放棄左!