潮州粉果

整左專員至愛粉果弟弟 ^^

其實幾年前都試過一次, 不過當時完全整唔倒個皮, 不過個餡就好似, 所以今次用返同一個譜整餡, 個皮就跟阿蘇粉果家姐個方法, 加少少生粉(我上次個譜多好多)煲滾水之後倒粉入去攪勻之後先搓。(上次就倒水入粉太熱又搓唔倒…)

上面係第二碟, 呢碟係第三碟, 第一碟全部係穿既…

第一幅個樣好似似d, 第二幅就d皮薄好多

整到第三碟先搵倒方法令佢個皮冇咁易穿, 就係夾o係保鮮紙入面, 即係用膠手套效果都一樣, 不過都係要夾o係保鮮紙入面碌平

第一次用自家種既菜煮野食 ^0^ 好開心~~

好靚好好味既蝦乾>0< 呢度係用剩既, 用既份量我唸都係咁上下, 一手倒廿蚊, 148蚊斤, 真係靚仔過蝦米好多, 我已經將圖中呢d當零食KO晒XD

沙葛, 豬肉, 花生, 芫茜, 蔥, 蝦乾, 冬菇切小粒, 加鹽、糖、五香粉、胡椒粉、麻油抄到8成熟, 原來o個陣味係大量五香粉

跟住就係澄麵(加1-2茶匙生粉)同滾水1:1趁熱攪勻再搓, 阿蘇家姐好似話搓搓下會透明?又唔係好覺…同時亦唔係好覺搓起黎有粉粒

包喇包喇~

放工買完送就開工(5點幾)整到9點幾專員返黎仲包緊XD整得太多喇, 完全唔識預份量, 我唸整左六十幾隻, total 4碟, 2個人一餐KO左2碟半, 半碟今日食左, 仲有一大碟放左入急凍~

咁大個女都未試過食咁多粉果XD(我麻麻地D花生)不過專員就可以一次食12隻勁大SIZE *0* 依家雪櫃有咁多存貨可以慢慢食lu ^0^