2月有感＋近況

去年2月, 佢o係哈爾濱同我求婚, 當時感覺太長遠, 唔敢開始準備, 書展見倒《我們的低能婚禮》都唔敢買, 驚佢有壓力。

今年2月發現jan wong, snap有驚喜, 開始搜集資料同儲錢。當時其實好想同人講，不過又唔敢…於是開左呢個神秘wedding blog :p

明年2月我地將會去台中影婚紗相，已經買左機票。

 

自從今年619公開左, 踏入一周年倒數之後, 日子好似過得好快

以往成日覺得仲有年幾大把時間, 我地又唔擺酒, 朋友話唔擺酒冇咩搞

依家望倒個計時器見倒十個月零幾星期好似近左好多

好多野都安排左出年先落實執行, 依家依然係資料搜集階段

最近搵緊既項目有花車、髮型、回禮包裝、邀請卡設計，實習緊既有蛋糕同回禮，另外仲想搵多間平平地又冇咁悶既婚紗相。

減肥進度係０