9天假

放左9日大假, 聽日又返工喇~
呢個假期幾乎用晒黎照顧肥豬~ 其實都冇咩要照顧, 除左o岩o岩做完手術o個2日成日訓得唔好俾佢嘈醒!

放假前夕7月17日晚同左CATFOOD媽媽、小刁、馬丁同飛飛去又一城simplylife食野預祝小刁生日~ 感覺唔錯~ 等位o個陣有人俾好好味麵包同西柚汁食~ 食完叫佢地幫手影相, 佢會搵個影得好d既過黎XD 係臨走O個陣買特價麵包($23/3個)有個女人插隊跌左個包落我度…個店員黑面話要買左佢…佢唔理…不過就係咁唔好意思話唔知個袋冇封口…

7月18日首先有師傅黎換冷氣~終於有覺好訓~ 下晝去左沙田買出年新年去台灣既機票, 跟住去左睇戒指，第一次去麻布茶坊食野，不過始終都係食唔倒佢既靚靚雪糕:p

7月19日晨早帶左肥豬出旺角睇醫生, van出van入, book埋第二日做手術。返黎車左個軟墊俾佢訓。

7月20日一早帶左肥豬去做手術我就同左daddy去好耐冇去既澳洲牛奶公司食早餐~第一次食倒早餐咋, 亦係第一次食呢度既通粉, 真係麻麻:P 另外仲叫左份好好味既公司治。 服務好唔錯呀, 見我地未食完嗌埋單仲叫我地食埋先~ 黎左4次SO FAR都好唔錯呀~

由於要等幾個鐘接肥豬, DADDY又要返工, 於是一個人去左行旺角, 行左上海街, O係陳枝記買左好多野中跟住買左條白色連身展裙(好低胸下@@唔知幾時先有機會著^^") 跟住行埋馬健記, 買左一本狗書一本鼠書同一本杯子蛋糕書~ 跟住唸住行去圖書館坐之際就收倒診所電話叫我去接肥豬, 話佢醒左~ 當時大約過左6個鐘, 去到都等左好耐, 結果走得既時候已經差唔多過左8個鐘喇~ 我地又搭VAN入返大埔~

呢日肥豬好支力, 都好好訓, 不過半夜4點拍門嗌我起身帶佢去街尿尿…=0=感覺好淒涼…從來冇唸過我會半夜4點獨自溜狗... T^T

7月21日九點幾又起身帶佢去街…跟住順便出去買黃子華(十點開售)排左4個字倒(10:20-10:45) 冇呢過大埔呢間通利都要排隊@0@, 不過已經冇晒星期56既飛, 買左9月2~ 有冇人都會去睇呢?
期間排我後面個女人講住電話話排第廿幾個, 唔會買唔倒呱廿幾個人買晒咁多張飛?(下?佢以為全港得大埔有飛賣?)
跟住去左買雜菜湯料煲湯, 返黎再服侍大帝, 主要係帶佢去街, 呢日好似去左6次? 同埋唔好俾佢太興奮, 郁得太犀利
尋晚daddy怕佢見倒佢太興奮忍住唔入黎睇倒, 第二晚終於入黎喇~ 頭痛痛既我都要出去食壽司…
返黎再黎埋頭頭寶寶既生日cupcakes~

7月22日咩都冇做過, 夜晚出左去daddy屋企食飯~

7月23日都係o係屋企, 整左曲奇同2款鬆餅

7月24日終於都係要去書展, 原本唸住第一日去, 不過要照顧大王, 改左今日, 去既時候都好擔心佢會唔會有問題, 一心唸住快d返, 結果都行左7個鐘…daddy放工返黎先~ 我成11點先返到:p 去書展之前就去左旺角同大王攞多十日藥~

7月25日成5點先出大埔街市食好好味既凍檬同燒牛柳沙律~:D~~~~~ 跟住買埋雞脾返屋企住~ 夜晚一路食雞脾一路睇港男睇得好開心XD 可惜我覺得最靚仔既十號入唔倒圍, 尋晚冇咩表現, 反而一號都幾OK, 勁似陳山蔥!但我就唔怕阿JACK有咩好, 不過LAST一PART又真係耍得最好。

7月26日 最後一日假喇~ 洗左一機衫, 拖左2次地~ 整左2個黃綾2個紅綾, 目的係試吸個囍字印, 可惜失敗左…一印就碎…唔通要焗之前吸? (冇影到相)夜晚再出去daddy屋企食飯~ 食左好肥美既澳洲蟹, 伊麵, 睇埋美女廚房同超級巨星~ 可惜睇到11點就要返歸喇~~~

咁就放完我9日假~ 黎緊呢個星期仲好多野做~ 不過5日後又放9日喇~~呵呵呵~~