選擇

好多女仔打死都唔會做主動, 有人追又唔抗拒就一齊, 朋友個妹就係咁, 一齊左先知原來佢鍾意O個個都鍾意佢, 只係遲左…依家佢嫁埋俾唔抗拒o個個~

依家仲有人覺得女仔做主動對方會覺得冇尊嚴…我覺得好不可思議…咁都覺得冇尊嚴呢個男仔本身都好冇自信

另外仲依然聽倒有人話女仔做主動, 對方會唔稀罕。其實男仔做主動都唔見得會好珍惜。幾多人追左返黎就對人衰, 呢樣野唔關邊個主動時, 佢係愛你既佢點會介意你做主動。男追女都一樣, 幾多女仔俾人追倒返黎之後反而對對方死心塌地要生要死~

等人追既女仔就只能夠o係追佢既人入面選擇, 可能有, 可能冇, 可能有幾個, 可能有好多, 但係多極有限, 個個好似狄娜咁年終一千幾百個有錢佬專業人士等你揀咩~

我一向認為鍾意既野要自己伸手去攞, 攞唔攞倒係另一回事, 想約邊個陪你做d咩咪問下佢囉, 唔去咪算囉~ 唔一定套用o係愛情上~ 不過愛情亦同一道理。

最近睇love group又有人有timing問題, 佢後來先發覺對方都鍾意佢, 不過發現既時候雙方都唔再係單身。講一句會蝕咩~ 唔講就真係蝕喇~冇左唔同怨~

細個可能會驚講左fd都冇得做~ 早排聽返絕情谷倪震成日話「你真係恨做呢d朋友咩?」甘心做朋友就唔會o係度囉囉鬈~只係做唔成情侶, 朋友都好過冇咁…「最佳位置」呢d…咪盞眼冤, 況且依家咩年代, 唔見得講左會冇fd做~

何必局限自己既選擇o係咁有限既範圍呢? 明明每一個你遇上既人都可以係你既選擇~ 鍾意一個人唔駛其他人同意個喎, 佢鍾唔鍾意你又係佢既選擇~ 你總算揀左~ 做左野丫~