6月婚紗展

尋日同男友連同一對就結婚既朋友去左行婚展, 會展的確比上次九展好行, 不過上九展一樣主要都係酒席同婚紗相。

婚嫁時刻

之前o係新婚會登記左收倒請柬可以換飛, 但係朋友上次登記左, 原來要抽籤收倒e-mail今次先有飛換…憑票跟一本過期婚嫁時刻, 我o個本係2月號, 場內有得賣$20, 新一期$38

婚戒

戒指係我此行既主要目標, 我以為會好多行金鋪擺埋一齊好方便揀, 點知新世紀仲好行過佢…得幾間鋪仔, pn勁多人, 謝瑞麟又冇擺d光身戒指o係會場, 周生生又冇擺…冇得同佢試下上次睇中o個d…

唐餅

朋友此行既主要目標係買餅卡同搵證婚律師, 奇餅極其多人排隊, 見倒條蛇餅好似打到第三行! 佢地排隊既同時我同男友就周圍行下

同場見倒另外2檔唐餅--榮華同恆香拍晒烏蠅, 同奇華形成強烈對比! 一向對恆香老婆餅好有信心, 於是買左個黃綾試下, 9.5一個大大個, 成為我地此行既收穫, 但係一d都唔酥…自己整仲好味d…加強左我自己整黎派餅既信心

pre-wedding

同上次九展一樣有好多台灣婚照公司, 最落力拉客亦係佢地…原來台灣一樣係咁chur…好在我地揀o個間唔係呢種style

另外發現左一間叫「攝影堂」既大陸婚照公司d相幾吸引, 佢本小冊子設計好時尚, 一d都唔娘, 仲要只係2k幾就有一輯, 但係貴既去到萬幾都有, o係深圳, 廣州同一個遠d既省份都有分店。

請帖回禮

睇左2, 3間印帖同回禮小禮物既公司, 我比較鍾意長形既帖, 有d有通花剪紙幾靚, 不過好貴同好易爛(十幾蚊張), 普通一張由4個幾到8個幾都有, 我地2個都幾鍾意日曆型, 清楚簡潔。回禮方面, 冇一樣吸引, 都係無聊小擺設, 筷子咁, 我寧願收倒筷子…每樣都要十幾蚊…十幾蚊份擺廿圍要成三千幾…大部份人都唔會鍾意, 仲有d未必帶走…真係可以慳返, 難怪我上2次飲戾刪除左呢個項目。