Mango Souffle

個譜save左好耐已經忘記左個出處
好耐冇整梳乎里, 屋企又有芒果, 就搵下自己個網有冇食譜啦~ 原來真係有2個芒果梳乎里既食譜, 一個用果芒醬, 今次用左鮮芒果呢個

同之前整原味既做法有d分別
之前係咁既

原味梳乎厘(4杯)今次整左半份
　
材料：A
蛋黃2隻、砂糖30克、牛奶90毫升、麵粉20克

材料：B
蛋白4隻、砂糖20克

做法：
1. 蛋黃加入30克糖打勻，加入已篩好的麵粉攪勻成糊狀；
2. 牛奶煮熱，加入麵糊中快手攪勻，座於熱水上不停攪至稠糊；<<<攪唔稠…
3. 蛋白打至起泡，放下20克糖，再打至企身，加入麵糊中混合 ；
4. 將麵糊放入焗杯中，約8成滿，入焗爐以200C焗12分鍾取出，撒上糖霜即成。(未夠12分鐘就出爐)

而今次就係咁
芒果梳乎里
材料：

麵粉21g、牛油14g、鮮奶64g、蛋黃2隻、芒果1個攪茸、橙酒1/2湯匙、蛋白2隻、砂糖28g、糖霜少許(灑面用)

做法：

1. 麵粉及牛油拌勻，加入已煮熱之鮮奶中煮至幼滑，再加蛋黃、芒果及橙酒邊攪邊煮至糊狀成蛋奶糊。

2. 蛋白打至起泡後加砂糖再打至光身及企身，加入蛋奶糊輕手攪勻。

3. 把梳乎里分別盛於9個已塗抹牛油及灑糖粉之焗盅內，大概八分滿(我放滿抹平)。後置已預熱10分鐘之200度焗爐焗20分鐘(15分鐘都夠)，出爐後面灑上糖霜即成。

＊　　　＊　　　＊　　　＊　　　＊　　　＊　　　＊　　　＊　　　＊

牛油冇整溶就加左麵粉…於是成煲座熱水拌勻, 跟住加入叮左20秒既奶, 分三次慢慢加入, 拌勻先加第二次, 咁就解決左上次拌唔勻既問題。(做法似日本棉花蛋糕), 同上次唔同既係今次要加芒果茸, 同橙酒。同埋蛋黃係呢個時候先加, 而原味食譜就係蛋黃加左粉先, 唔駛落牛油。
另外延伸之前整戚風同棉花蛋糕既經驗, 將蛋奶糊加入蛋白, 而唔係蛋白加入蛋奶糊, 好快攪勻入模。

不過食唔倒芒果味:p 專員臨尾就食倒。只係食倒橙酒味^^"
都幾甜可以再減少少糖。