父親節蛋糕2號~荔枝天使+jelly

整俾男友daddy既父親節蛋糕~左唸右唸, 最後決定整荔枝mousse~蛋糕底就用蛋白蛋糕~之前o個用左2隻剩左既蛋白整左一份, 但好矮, 下次試下加少少發粉好似整chiffon咁應該會好d。尋日結果用左4隻蛋白再整, 加左雲呢拿油, 終於冇乜蛋腥喇~~不過比起有蛋黃o個隻蛋糕都係有ddun, 同埋冇咁香~但冇牛油冇蛋黃就健康好多~我仲特登用左代糖~

蛋白蛋糕：4隻蛋白+40g糖打至濕性發泡, 篩入低粉60g+糖10-20g輕輕拌勻即可入爐。190'C焗約25分鐘, 如見轉色可蓋上錫紙。

荔枝慕絲食譜（改自榴槤慕絲蛋糕）：荔枝茸250g(我用攪拌機攪成茸, 大約加多左十粒), 蛋黃2隻+糖35g座熱水打至奶白色, whipping cream200ml 打起放雪櫃代用, 魚膠粉以2茶匙:2湯匙水的比例開勻叮溶。(我見佢咁稀加多左魚膠粉, 結果硬左d同有陣魚膠粉味…不過又係得我一個食得出…)

朱古力裝飾：用刀yam白假力溶液抹在膠片上，待凝固後小心拿起貼在蛋糕上即成。

組合：整好蛋糕底取出放涼甩模切片，一塊蛋糕片鋪底，上面淋上一層荔枝mousse，再一層蛋糕片，一層mousse，最後淋上一層荔枝jelly~可於mousse中鋪上荔枝肉。

大ｏ個個未雪硬已經要出街～一去到鼎泰豐就叫佢幫我雪起佢～之後o係o個度切埋食埋~有個姐姐仔埋黎問呢個咩蛋糕黎, 我地話荔枝蛋糕, 男友話「自己整架~」「自己整咁犀利呀~*0*」XDDDD

JELLY唔太硬, 好濃荔枝味, 令蛋糕生色不少~本身我用左250荔枝整mousse都唔夠味, 再加多d都唔係好夠味, 就算本身幾甜都好, 始終唔夠jelly咁夠味~唔鍾意蛋糕有jelly既男友都話ok~

細呢個切件帶左返學校食, 食過既同事都食唔出魚膠味, 不過都係我食得最多XD

整左一盒荔枝jelly, 順便整左1大2小杯jelly~男友話好清新~冇果肉冇咁正~