小學同學結婚

好開心呀~>0<

小學同我好老友個同學仔十月要結婚喇~~真係好戥佢開心呀~!!!

我冇估錯既話佢老公應該係我所認識o個個, 佢地識左9年行左6年, 一齊開過鋪頭, 又試過差d因為要去外國讀書而分開, 個女仔去左外國陪佢讀一個月短期course, 之後返左香港, 個男仔最後都冇完成學業返左香港daddy公司幫手。

我同呢個同學仔大大話話都有年幾2年冇見喇, 平時聯絡都唔多, 不過每次聯絡返都會雞啄唔斷, 感覺依然老友！^^ 我覺得老友就係咁既一回事，唔需要成日見成日聯絡，感覺都唔會變！

本來呢通電話係約小學同學食飯既，閒談間講到有２個同學結婚，佢話佢十月都結喇，仲問我做唔做姊妹。我雖然打左個突，不過真係好開心，唔係有得做姊妹開心，而係戥佢開心！我覺得係一件好值得高興既事！

不過我唸我未必做姊妹喇，雖然好想睇住佢出嫁呢一刻，細細個已經去佢屋企玩，同佢屋企人都幾熟，不過佢其他Ｄ姊妹我又唔識，戇居居咁…

 

曾經有２個好熟既女仔ＦＤ話結婚搵我做伴娘，佢係其中一個，可想而知，我地當年感情係幾咁好。

 

記得中四Ｏ個年我提名左佢參加ＹＥＳ校花選擇，當年好多人o係街撩佢，又好多人話佢似蔡少芬，之後李采樺出道又有人話似佢，最後佢縮沙退出左校花選舉，最近我發現原來當年李小姐都有參加如一選舉@@！

佢第一個男朋友我好唔鍾意，因為對佢唔好，我甚至試過為呢個人而同佢鬧交…

小學六年級ｏ個年我地每日都一齊返學放學，又會去對方屋企玩，同佢屋企人打麻將，仲交換左幾張童年照片。最鍾意搭校車ｏ個陣玩貼紙，點玩呢？我地會比賽唱歌啦，幾個人每人出一張，贏左ｏ個個就會得倒ｄ貼紙；又或者拍賣啦，用幾張貼紙換一張特別靚既；我地仲會玩估銀仔，每人出１毫至２蚊，估下大家加埋有幾多，估得最接近ｏ個個可以得倒ｄ銀仔；我仲教埋佢地玩話事啤XD 佢後尾話返我知，原來打麻將都係我教佢架~XD不過點解我成日輸比佢既？？？XD

以前每年中秋節都會約埋幾個同學一齊落平台玩蠟燭，成個平台都係燭光閃閃，到依家都仲好懷念；到左中學某年，我已經搬離美孚，專登返去同佢玩蠟燭，點知平台黑媽媽，原來已經唔俾玩喇…

 

o係我心目中佢係一個好幸福既女仔。細個成績好，家庭和睦，每次去佢屋企都見倒佢阿爸阿媽感情好好，阿哥又錫佢。屋企唔算好有錢，不過都唔駛憂柴憂米，零用錢唔少。本來係肥妹仔，到左中四忽然變得好瘦好靚，食好多野都唔會肥，開始拍拖，o係街好多人搭訕，男朋友一個換一個，雖然唔係每一個都咁好。到後來，佢遇倒２個好好既男朋友，其中一個去外國讀書冇左，另一個就係依家呢個老公。佢老公好錫佢，聽佢講起對方都好似睇倒佢既笑容一樣，兩小口子曾經一齊經營時裝+figure店，由雙方家長打本1未來老公屋企有錢，十幾歲中七畢業已經開住架吉普車車佢呢度去ｏ個度去。當初呢個男仔去外國讀書既時候佢地只係o岩o岩開始，難捨難離，佢媽咪見倒佢日日o係屋企喊，於是買埋機票俾佢去搵呢個男仔，呢件事我好深刻，我相信作為女兒既一定感受倒母親既愛。

佢係我遇過最幸福既人，見證住佢人生好多個唔同既階段，如今睇住佢出嫁，居然有少少嫁女feel，但願佢繼續幸福快樂，直到永遠！^^