搏鬥

前晚久違既感覺突然返黎－－忽然有隻曱甴o係我頭頂擦過！！！好耐冇俾飛曱甴嚇過…對上一次有佢ｏ係度一手幫我捉住，今次一個人都冇…= =

我聽倒「佢」降落左o係隔離張書檯上面，但係只聞其聲不見其影…之後繼續上網，佢又突然爬到我面前大約一尺距離倒既地方，足足有我隻手指尾咁長…我慢慢後移，跟住入廁所攞左本雜誌旁身，唸住等佢一移到平面既地方就拍落去！佢飛到牆上，我輕輕掩埋度門，點知佢又飛左上書架上面我見唔倒既地方…我緊握雜誌坐ｏ係床上唔知點做好，忽然佢又飛左出黎…仲ｏ係燈膽附近盤旋…=__=" 我唸住佢一跌落黎就拍走佢架喇，點知佢飛左去電腦檯上面擺袋既地方…見倒佢ｄ觸鬆郁郁下><|||跟住我走左去開窗唸住等佢飛走啦，不過又驚有更多飛入黎喎…最後聽倒佢飛左飛就再見唔倒佢喇=口="!!!

呢個時候已經係半夜2點幾，點算好呢，我開左窗開左平時唔會開既窗簾企左ｏ係度，搬過隔離房訓，又有好多衫ｏ係床上面要執；訓廳又有大蜘蛛又驚咁空曠一陣唔知又有ｄ咩飛出黎襲擊我…結果我決定大被cum過頭訓，最緊要佢唔好跌落我塊面，都唔好跌落我個身度！呢個時候神經緊張到一聽倒少少聲就覺得係佢既拍翼聲，一見倒黑色一小團就以為係佢既真身…雖然我唸佢應該仲驚過我…結果訓到半夜熱醒左成身汗起身開冷氣，起身o個陣發現個窗唔知點解閂剩幾吋闊。眼不見為乾淨，希望佢走左啦…

結果尋晚返屋企之前去左買殺蟲水同曱甴藥餌對付佢，一返到屋企想放低o岩o岩收入黎ｄ衫既時候發現左之前見過o個隻大蜘蛛，即刻放低ｄ衫，使出新買既殺蟲水對付佢，點知噴到一地都係佢都仲係咁走，結果我要用個噴罐底dup佢，dup到佢斷左幾隻腳先死，不過我都俾ｄ殺蟲水跣到跌瘀左膝頭…當時o個種狠勁簡直係將對飛大強o個種恐懼發洩晒o係佢身上！

之後就入房周圍噴，噴完隔左一陣就入房上網，上上下突然又聽倒有聲，跟住仲見倒窗簾後面有物體向下移動既影子，我又立起本雜誌，一手雜誌一手殺蟲水，鼓起勇氣撩起窗簾，佢真係飛出黎呀！可能我冇噴到窗簾所以佢呢左入去，好可惜我冇開到窗呀！！！＞口＜呢個時候緊係對住佢起勢噴啦！佢一路受刑一路飛，最終跌左落床尾ｄ雜物度，我再噴多兩野之後就慢慢拎開ｄ野，見倒佢已經垂死掙扎，呢個時候ｄ緊張氣氛先緩和左落黎…

跟住我搵左個好耐冇見既掃把仔出黎掃左佢沖左落廁所，終於大功告成，一晚殲滅左兩隻可怕大害蟲！呼～輕鬆晒！

其實我屋企一向都冇殺蟲水，今次亦係我第一次買，之前就算有曱甴我都只係買藥餌對付佢地，都幾work架，不過見效就冇咁快，今次發現手執殺蟲水殺敵真係唔錯，噴兩噴即死，果然係「殺他死」！快靚正，不過就噴到我一床都係，訓醒間房都仲係成陣殺蟲水味…