最熱既年三十晚

今日阿婆同舅父一家共五人由鄉下黎左, 部分O係我度住。熱鬧左一個黃昏, 依家靜晒。

十點幾阿媽帶左細舅父走, 阿婆、二舅父舅母訓左, 剩返我表弟O係廳睇電視睇得好開心XD

11:20分既呢一刻, 表弟都熄埋燈, 得返我一個...仲靜過平時....因為唔開得聲...=0=

原本每年如果O係香港過年都會去一個長輩度團拜, 不過頭先打去話整親腳開唔倒門…話約埋初八先出黎飲茶團拜…但係…初八阿婆已經返左去…=0=

聽日約左叔公飲茶, 不過阿媽又話我去唔去都冇所謂, 唸唸下有D唔想去…可能初八都會見…

阿婆佢地O係鄉下帶左好多好多野食落黎, 簡直係不可思議…@@鹵水鵝一隻、雞一隻、鼠殼粿一袋, 墨魚2包, 牛丸4斤, 魚片一袋, 粿肉一袋, 涼果一大袋, 齋菜一大包…整糖水既材料(紅棗、薏米、薑薯等等)一袋, 醃野一樽, 瓜子一袋, 楊桃、柑…糭一大袋…蝦米一大包…椰汁幾罐…=0=最勁係連粉絲都帶左幾包落黎!!!點食呀…唔肥死真係偷笑…唔怪得D行李重成咁………

唔知佢地今次黎幾多日, 佢地想去迪迪尼, 我又冇咩興趣, 佢地想報D1DAY團, 上網睇過有好多線, 唔知去邊好, 有D去迪迪尼, 有D去海洋公園, 但係唔跟團自己去好呢?不過我都未去過…我都唔識帶…

星光大道, 山頂都可以一去, 唔知佢地想去D咩地方, 想去出名既又好似真係唔去迪迪尼唔得…但係黎緊幾日天氣都好似麻麻…行街又唔知阿婆有冇興趣, 留O係屋企又好無謂…點好呢?

今日全日著短T, 但見倒街上D人都著得幾多@@仲可以戴冷帽!!阿婆仲話我著得少…@@